25. februarī Latgolys viestnīceibā GORS dasmytū reizi padeve Latgalīšu kulturys goda bolvu “Boņuks”. Svineigā ceremonejā gūdynuoja spylgtuokūs i lobuokūs sasnāgumus latgaliskajā kulturā 2017. godā. Vysvaira Boņuku, kūpumā 3, sejēme apvīneiba “Latgalīšu Reps”, par goda cylvāku kliva režisors Vīsturs Kairišs, par goda nūtikšonu – 4. pasauļa latgalīšu saīts “Latgolys symtgadis kongress”. Kūpā ar Latgolys viestnīceibys GORS pasuokumu producenti Dairu Lāci i Mārketinga nūdalis vadeituoju Edeiti Husari atsaveram iz "Boņuks 2017".

Itymā godā padeve divejus Boņukus par myuža īguļdejumu latgalīšu kulturys atteisteibā. Pyrmū reizi itei bolva daškierta kaidam nu trymdys latgalīšu. Boņuku sajēme Vuocejā dzeivojūšais Aļberts Spuogis, kurs lelu daļu sova myuža veļtejs latgaliski raksteituo vuorda saglobuošonai. Sovulaik jis dorbuojēs Andryva Jurdža fondā i kuortuoje Latgaļu izdevnīceibys lītys, sataiseja latgalīšu literaturys i kulturys materialu kruotivi “Latgaļu sāta” Minsterē. Iz Latgolys školom i bibliotekom syuteja trymdys latgalīšu izdavumus, struoduoja par školuotuoju i raksteja dzeju i dareja daudzys cytys lītys latgalīšu volūdys saglobuošonai.

Ūtru Boņuku par myuža īguļdejumu sajēme volūdneica Lideja Leikuma. Tim, kas interesejās par latgalīšu volūdu, Lidejis Leikumys vuords nav svešs. Jei ir Latvejis Universitatis profesore, sovys zynuotniskuos interesis saistejuse ar latgalīšu volūdys vaicuojumu pieteišonu, volūdys izglobuošonu i populariziešonu. Sastuodejuse vuiceibu leidzekļus latgalīšu volūdys apgivei, leidzdorbuojusēs latgalīšu raksteibys nūsacejumu izstruodē. Organiziejuse ekspedicejis da Sibira latgalīšim i īsasaistejuse latgaliskuos kulturvidis nūtikšonuos. Ar Lideju Leikumu tikomēs pyrma pošys Latgalīšu kulturys goda bolvys “Boņuks 2017” padūšonys ceremonejis.