"Kolnasātā" gostūs Vuocejis latgalītis Laura Putāne i Karīna Cīglere. Laura dzeivoj Štutgartē, voda tī deju kolektivu “Trejdeksnītis”, ir ari vadeituoja Frankfurtis deju kolektivam “Dimdari”. Laurys panuokumi i da šam padareitais 2017. godā tyka nūvārtāts padūdūt jai "Laiks Ziedonim" bolvu nominacejā “Kedas” par nūvodpietnīceibu. Karīna i Laura aktivi dorbojās latvīšu kulturys bīdreibā “Saime”. Pārn juos kūpā organizēje vierīneigu pasuokumu Vuocejā - “Eslingenys džīsmu svātkim 70”. Svātku laikā topa uzvadums, kuru Karīna i Laura planavoj itūgod atvest iz Latveju, Rēzekni.

 

Jau nu 1989. goda Latvīšu kulturys centrā Daugovpilī dorbojās senioru deju kolektivs "Atbalss". Doncuotuoji soka, ka dzeive ir kusteiba, i deja paleidz uzturēt sevi lobā fiziskā formā. Sovpus deju kolektiva vadeituojs Ivars Mironovs smejās, ka kolektiva dalinīku dažaidais nacionalais sastuovs ir cīši lobs pīmārs sabīdreibys integracejai. Ar doncuotuojim sasatyka Gunta Nagle.