Latgolu dievej par Zylū azaru zemi, eipašu uzmaneibu pīsaista Rāznys azars i tuo apleicīne. Par Latgolys jiuru dāvātais azars i tuo apleicīne vaira kai 59 000 ha plateibā veidoj Rāznys Nacionalū parku. Itys gods parkam ir zeimeigs, jo paīt 10 godi kai nu dobys parka tis klivs par nacionalū parku. Par gūdu itam nūtykumam izguojuse gruomota i Rēzeknē gaidoma konfereņce. Raidejumā par tū, kai Rāznys Nacionalajā parkā vīnkūpus sadzeivoj dobys bogoteibys i cylvāku saimnīciskuo darbeiba, kur sliepjās parka unikalitate, kaidys izmainis parkā nūtykušs pādejūs godu laikā, īsaveram ari gruomotā “Rāznas Nacionālajam parkam 10 gadu”. Gostūs Dobys aizsardzeibys puorvaļdis Latgolys regionaluos administracejis puorstuovis Anda Zeize i Aina Skredele.

 

Kai dzeive rit Latgolys cīmatūs, devēs nūskaidruot Laura Ieviņa. Jei gasteja Rykovā, cīmatā storp Rēzekni i Viļānim. Laura teikās ar vītejū školuotuoji kas atkluoj vītys viesturi, folklorys kūpu, kas gatavejās Dzīšmu svātkim, i jaunū uzjiemieju-amatnīku, kurš rauga atrast sovu nišu i uzsuocs kūka rūtallītu ražuošonu.