"Kolnasāta" sasateik ar Rēzeknē dzymušū varganisti Ivetu Apkalnu. Jei ir vīna nu Eiropas aktivuokūs i pīpraseituokūs varganistu, snādz koncertus slovanuokajūs Eiropys, Azejis i ASV koncertnomūs, dažaidūs festivalūs. Iveta Apkalna ir jaunatkluotuos Elbys filharmonejis Gūda varganiste. Sajāmuse leluokys i mozuokys bolvys, tūs vydā ari Latgalīšu kulturys goda bolvu “Boņuks” kai goda cylvāks kulturā. Oktobra beiguos trešū reizi Rēzeknē izskanēje Ivetys lūluotais vargaņu muzykys festivals „Organismi”, ar Ivetu Apkalnu sasatykom festivala laikā.

 

Sorkonboltsorkonais karūgs – Latvejis vaļsts simbols. Simbols, kas rodīs leidz ar latvīšu naceju. Svareiguos i zeimeiguos nūtikšonuos tys plivinēje vēļ pyrma Latvejis proklamiešonys. Ar sorkonboltsorkonajim karūgim ļauds guoje ari Latgolys kongresā pyrma 100 godu. Leidz myusu dīnom sasaglobuojs karūgs nu ituo kongresa, tys ir vīns nu senejuokūs zynomūs Latvejis karūgu i globojās Latgolys Kulturviesturis muzejā Rēzeknē. Latvīši sova simbola kruosom īsadvesmuoje nu Atskaņu hronikys. Kas tymā raksteits par karūgu, pieteja Vineta Vilcāne.