Itūnedeļ raidejumā saruna ar akteri i režisoru, sēlīti, kurš, Daugovpilī dzeivojūt, ir īsavuicejs latgalīšu volūdu, Māri Korsieti. Myusu kolege Silvija Smagare beja nūguojuse iz kaidu nu mieginuojumu Daugovpiļs teatrī, kur itūšaļt īt aktivs dorbs pi bārnu izruodis “Raganiņa”, kurys pyrmizruode gaidoma jau pavysam dreiži, 12. decembrī. Zeimeigi, ka itei byus pyrmuo bārnu izruode Dauovgpiļs teatrim, kurā skanēs ari latgalīšu volūda. Īstudejuma lugys autori  ir Daugovpiļs teatra akteri Māris Korsiets i Egils Viļumovs. Obeju rodūšajam tandemam jau ir boguota pīredze īstudejumu bārnim veiduošonā. Itymā izruodē Egils Viļumovs ir scenografejis i kostimu autors, bet  Māris Korsiets – režisors.

****

Sižetā Guna Igavena stuoseis par rodūšū dorbuošonūs Zīmyssvātku nūskaņuos J. Soikāna Ludzys muokslys školys Nautrānu filialē. Ite kas nedelis vysaida vacuma vītejī ļauds pīsadola školuotuojis, floristis i muokslineicys Maijis Gailumys vadeitajā rodūšajā darbneicā. Vaicuota par jaunuokajom tendencem rūtuojumu izvēlē, Maija pīzeist, ka niu ļauds palykuši cīši praktiski. “Agruok Zīmyssvātku rūtuojumu izgataveituoji vaira dūmuoja par bārnim, par pīmāru, niule tī ir cīši nūpītni, stilizāti, dizainiski... Vysi gryb, kab telpys palyktu kuorteigys i skujis nabiertu. Es dūmoju, ka tys myusdīnu praktiskais latvīts niu ir par daudz praktisks. Tei doba jū nimoz nauzrunoj, jo dobā jau vysod koč kas byrzt i kreit. Eipaši saimēs, kur ir kači i mozi bārni.”

Kas vēļ interesanti, vītejā bibliotekā leidz pat jaunam godam ir apsaverama rēzeknīša Andreja Turlaja senejūs egleišu rūtuojumu izstuodis kolekcejis daļa.

***

Latgolys Kulturys centra izdevnīceiba cytugod,  svieteis 30 godu jubileju – tei ir rodusēs 1990. g. 1. junī. Viesturnīki pījem, ka vīnys paaudzis laiks ir 25 godi, taitod – Latgolys Kulturys centra izdevnīceiba ir izaudzynuojuse vysmoz vīnu paaudzi. Izdevnīceibys vadeituojs nu tuos suokumu da ituo laika ir Juoņs Eļksnis, kurs par sovu dorbu ir sajiems Treju Zvaigžņu ordeni (1994), Latvejis Lapnuma bolvu (2016) i “Zelta ābele” apbolvojumu par myuža īguļdejumu gruomotnīceibā (2017). 29 godu laikā Latgolys kulturys centra izdevnīceiba ir izdavuse ap 500 gruomotu. Kaidys gruomotys ir izdūtys 2019. godā? Kaida ir tūs nūzeime latgalīšu kulturā i kū jaunu tuos atkluoj par Latgolu, latgalīšu volūdu i viesturi?"  Iz itim i ciyim vaicojumim gruomotplauktā mums paleidzēs rost atbiļdis Ligija Purinaša.