Daugovpiļs nūvods ir īprīškejā teritorialajā reformā sataiseita pošvaldeiba Latvejis dīnavydaustrumūs, kas sovā ziņā atsarūn gon Latgolys, gon Sēlejis viesturiskajuos zemēs. Šūbreid nūvods apvīnoj 19 bejušuo Daugovpils rajona pogostus, kur dzeivoj ap 20 tyukstūšom cylvāku. Te gon der pībiļst, ka vēļ pyrma desmit godu īdzeivuotuoju skaits beja par trešdaļu leluoks. Bezdorba leimiņs pādejūs godūs nūvodā vysā namaineigai svuorstuos 10–11 % rūbežūs. Ka leluokuos golvyssuopis nūvodā tān ir depopulaceja i bezdorbs, tod lapnums i golvonais turisma objekts – Daugovys lūki, kas šūgod pandemejis laikā pīsaistejs daudzi turistu. Jau cytugod jaunos teritorialuos reformys rezultatā nūvods tiks apvīnuots ar Ilyukstis nūvodu i iz prīšku tiks saukts par Augšdaugovys nūvodu.

Turpynojūt apzynuot dažaidu Latgolys i pīrūbeža nūvodu dzeivi i īdzeivuotuoju dūmys par teritorejis atteisteibu, itymā reizē sasateikam ar Daugovpiļs nūvoda dūmis prīšksādātuoja 1. vītinīku Aivaru Rasčevski, nūvoda Socialuo dīnasta vadeituoju Annu Jegorovu, Sveņtis vydškolys direktoru Aleksandru Sibircevu i SIA “Rubiki” vadeituoju Guntaru Vingri, kurs Daugovpiļs nūvoda īdzeivuotuojus nūdarbynoj plastmasys izstruoduojumu ražūtnē Leiksnā. Runuosim par dzeivi nūvodā tagad i reformys īspaidu iz prīšku.

 

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.

Īsaklausi! Raidam latgaliski!