Gastejam Sēlejā Ilyukstis nūvodā, lai kūpā ar vītejim īdzeivuotuojim i deputatim īzeimātu dzeivi jau cytā godā, kod piec teritorialuos reformys nūvods tiks apvīnuots ar Daugovpiļs nūvodu, kūpā veidojūt Augšdaugovys nūvodu.

Navar napīminēt, ka vēl ituo goda pavasarī ilyukstīši, protestejūt pret gaidomū teritorialū reformu, beja organizējuši smoguos tehnikys protesta braucīni. Mierkis – naapsavīnuot ar Daugovpiļs nūvodu, jo kai perspektivuoku i sev pīdareiguoku ilyukstīši redzēja īspieju kūpā ar cytim blokus nūvodim veiduot apvīnuotu Sēlejis nūvodu.

Sarunā pīsadola lauksaiminīks, Ilyukstis nūvoda dūmis prīšksādātuoja vītinīks Maigurs Krievāns (Latvijas Zemnieku savienība), ekonomikys školuotuojs, Ilyukstis nūvoda dūmis deputats Viktors Jasiņavičs (Saskaņa) i Vanda Gronska – Paula Sukatnīka sātu/muzeja „Apsītes” saimineica, vītejuo gide „Sēlijas salā” „Dvietes vīnogu sala”.

 

Latgolys stuņdē kai īrosts ari aizvadeituos nedelis aktualitatis i gaidomī kulturys dzeivis nūtykumi.