Raidejumā gostūs gruomotizdeviejs, Latgolys Kulturys centra izdevnīceibys vadeituojs Juoņs Elksnis. Jam daškierta gruomotu muokslys konkursa “Zelta ābele 2017” bolva par myuža īguļdejumu gruomotnīceibā. 

Latgolys Kulturys centra izdevnīceiba gondreiž jau 30 godus izdūd gruomotys latgalīšu rokstu volūdā, ceļūt gaismā gon pyrmskara latgalīšu literaturys paraugus, gon pulcynojūt ap sevi myusu dīnu autorus. Kai zynomuokī izdavumi, mynomi kulturviesturiskuo goda gruomota “Tāvu zemes kalendars” i literaturys almanahs “Olūts”. Pošaizlīdzeiguo gruomotizdevieja dorbs nūvārtāts ar Treju Zvaigžņu ordini, Latgalīšu kulturys goda bolvu “Boņuks”, bolvu “Latvijas lepnums” J. Elksnim daškierts Rēzeknis Gūda pylsūņa nūsaukums.

Sarunā ar Juoni Elksni par tū, kai aizasuoce juo ceļs latgalīšu gruomotnīceibā, par gruomotu izdūšonu i latgalīšu literaturu.

Laura Sondore-Strode sižetā stuosta par tautys muziciešonu Latgolā. Itei tradiceja sasaglobuojuse da myusu dīnu - muziciešonys prasmis teik nūdūtys nu vīnys paaudzis ūtrai.

Rubrikā "Vuordineica" literaturzynuotnīks Valentins Lukaševičs i muzikis Arņs Slobožanins stuosteis par vuordu “raudive” - latgalīšu parapsihologu Konstantinu Raudivi i peili.