Šudiņ raidejuma "Latgolys stuņde" diskuseja veļteita Latvejis symtgadei, kuruos svieteišona aizasuoce ituo goda pavasarī Rēzeknē ar Latgolys kongresa symtgadi i īs leidz pa 2021. godam. Daļā sabīdreibys ir švuorbys (šaubas), voi tik plaša programa i tuos izmoksys ir lobuokais veids, kai svieteit godadīnu. Cik aktivi ir Latgolys ļauds, organizejūt symtgadis nūtikšonys i pīsadolūt pasuokumūs, kai jī viertej oficialū svātku programu?

Studejā Rēzeknē ar žurnalistu i raidejuma vadeituoju Juri Saukānu Latvijas Darba devēju konfederācija puorstuove Maija Muceniece, horeografs, Deju svātku virsvadeituojs Ilmars Dreļs i kūktielnīks, pedagogs i gruomotu autors Antons Rancāns. Raidejumā tiks izklauseita ari Preilu nūvoda dūmis deputate i bīdreibys “Preilu NVO centrs” direktore Ineta Liepniece, kai ari itūšaļt (šobrīd) Niderlandē dzeivojūšuo, niu jau bejušuo Rēzeknis kulturys i turisma centra puorstuove Maija Paardekooper.