Aigars Runčis: ka volūda ir dzeiva i kluotynasūša, jei namierst

Aigars Runčis ir grupys „Borowa Mc” liders i latgalisko raidejuma „Kolnasāta” pyrmais vadeituojs. Turpynojūt svieteit Latvejis Radejis 100. godadīnu, saruna ar Aigaru par latgalīšu volūdu radejā, latgalīšu muzyku, kai ari par inovaceju i tehnologeju izmontuošonu latgaliskajā.

Aigars atguodoj, ka vodūt „Kolnasātu”, beja dikusejis par tū, kai lobuok runuot latgaliski, tod jam atskaitis punkts vysod ir bejs sovs tāvs.

„Maņ pošam kai raidejuma vadeituojam, beja cīši svareigi, i maņ tys beja atskaitis kriteries, voi mani saprūt muns tāvs i kotrys vīnkuoršs Latgolys īdzeivuotuojs, ka jis dzierd – re, Latvejis Radejā skaņ latgaliski, tī cylvāki runoj dzeivā, dinamiskā, takūšā volūdā.”

Grupa „Borowa Mc” pārnejā godā svietēja 20 godu jubileju, itūgod izdavuši jaunu dzīsmi „Mīļoj”, i Aigars atkluoj, ka tys ir stuosts par vysuskaistuokū meitini piec divdesmit godu.

„Mes vysi augam, atsateistam, dabojam jaunu pīredzi, bet aizviņ tei mīlesteiba ir ari piec divdesmit godu. I ar tū dzīsmi mes gribiejom poši sev i cytim atguodynuot, ka bīži saceit „mīļoj” ir skaistuokī vuordi, kū mes varim saceit.”

Aigars pats roksta ari dzīšmu tekstus, i jis skaita, ka lobai dzīsmei teksts i volūda ir cīši svareiga, kab uzrunuotu klauseituoju.

„Ka dzīsmis pavadejumā cylvāki krota golvu ci poši krotuos, tod dzīsme jūs ir uzrunuojuse, sasnīguse, i tys ir pats golvonais. Volūda i vuordi ir primari vēļ vīns instruments, kas teik spālāts dzīsmis laikā. Piec tam ir ziņa, kū ar tū tekstu gribi pasaceit, nūdūt kai teksta autors. Vysapyrms dzīsmei ir juoskaņ, i tam tekstam ir juoskaņ labi kūpā ar dzīsmem. Tys ir pats svareiguokais.”

Aigars soka, ka juoīt laikam liedza, pasaruoda jauni vuordi, ari anglicismi, volūda atsateita, tū navar īkapsulēt,

„bet svareigi, lai tev ir ari pīteikūši boguota dzymtuo volūda, lai tu jamā vari izasaceit.”

 Kab latgalīšu muzyka i volūda atsateisteitu iz prīšku, Aigars Runčis aicynoj runuot i raksteit lobu muzyku.

„Grybātum aicynuot, īdrūsynuot myus vysus vīnkuorši runuot latgaliski kasdīnā. Ka volūda ir dzeiva i kluotynasūša, jei namiers, jei nikur napaliks, jamā suokumā saprass, piec tam runuos ari myusu bārni, i tai tys ari nūsadūs i atsateisteis tuoļuok.”

Aigars Runčis kasdīnā struodoj kai biznesa izaugsmis dīnasta direktors telekomunikaceju uzjāmumā i ir puorlīcynuots, ka Latgolā ir daudz veidu, kur īvīst inovacejis, kur ir daudz kū automatizēt, vystik tyvuokajā laikā muoksleigais intelekts naaizstuos rodūšū procesu i muzyku turpynuos radiet eisti cylvāki.