Rēzeknis nūvoda Drycanūs vītejuo bīdreiba “LOBS” padsmit aktivus i radūšus jaunīšus četru dīnu garumā izgleituoja naformalajuos apvuiceibuos “Byut latgalīšam ir stileigi”. Taidā veidā styprynojūt jimūs latgaliskū ideņtitati, īpazeistynojūt vaira ar latgalīšu volūdu i muokslu. Kab veicynuotu jaunīšu iņteresi i vieļmi palikt Latgolā, naformalūs apvuiceibu laikā izskanēja ari vysaidi veiksmis stuosti. Par pīmāru, vīns nu eipašūs gostu beja Dāvis Suharevskis – latgalīšu kinys “Piļsāta pi upis” golvonuos lūmys akters. 

Apvuiceibys kūpā ar Ingūnu Semuli voda Juoņs Jurčenko, jī obeji Drycanu pogostā ir izveiduojuši saimi i regulari organizej pasuokumus jaunīšim. Itymā reizē jī beja pateikami puorsteigti par lelū jaunīšu iņteresi pīsadaleit projektā i cer, ka vyss pīdzeivuotais jim nūderēs ari iz prīšku.