Šūvokor kūpā ar komponisti, Latgolys viestnīceibys GORS Muokslinīcyskuos i pasuokumu nūdalis vadeituoju i pedagogi Ilonu Rupaini, Latgalīšu kulturys bīdreibys vadeituoju Ilgu Šuplinsku i muziki, muzykys pedagogu Ēriku Zepu atsavērsim iz aizīmūšū godu. Kas zeimeigs 2022. godā nūtics Latgolā i latgalīšu kulturā, ar kū tys īsazeimiejs i kaidys jaunys vāsmys nas?

Cylvāks kai vierteiba – par sevi puorlīcynuots, iz atteisteibu vārsts, styprys i gūdeigs kai pret sevi, tai ari pret cytim. Trauksmains puormaiņu laiks, kod cylvāki ir suokuši puorvērtēt sovu vītu i dorbuošonūs īrostajā. Vierteibu apsazynuošona i seve, sovu sapynu nūvieriešona. Vysi ituo vokora gosti izsver, ka itys gods nanūlīdzami izvierziejs cylvāku kai pamatvierteibu, kas liks mums iz prīšku arviņ vaira struoduot pi cylvākkapitala styprynuošonys, pošapzinis i identitatis vaicuojumu.