Itūreiz raidejumā klausitēs sarunu ar cylvāku, kurš sovu myužu veļtej seņču tradiceju vuokšonai, saglobuošonai i nūdūšonai paaudzem iz prīšku – Intu Viļumu. Pyrma ostoņpadsmit godu jei Dagdā izveiduoja Folklorys centru, kuru voda ari šudiņ, i ari kasdīnā guodoj par tradicionaluos kulturys populariziešonu i gūdā ceļšonu.Taipat Inta jau garus godus voda ari folklorys kūpu “Olūteni” i ir izdavuma “Dagdys nūvoda pyura skreinis gruomota” autore. Pi ituo izdavuma, kas stuosta par Latgolys tradicionaluos kulturys vierteibom Dagdys nūvodā, Inta struoduoja četrus godus i tikū kai par tū sajēme ari Latgalīšu kulturys goda bolvu “Boņuks 2019”.

Inta Viļuma stuosta par tū, kai 2002. godā tyka veiduots folklorys centrs juos dzymtajā pusē, Dagdā. “Tys beja na viņ svareigs, bet ari cīši vajadzeigs, jo Dagda atsarūn dīzgon patuoli nu Reigys. Iz tū breidi, tys beja 2002. gods, kod roduos napīcīšameiba veiduot koč kū tyvuok. sova veida kruotivi, kurā byutu daīmamys vysys ar myusu nūvodu saisteituos tradicejis i dzīsmis, kab navajadzātu vysim māruot tuolū ceļu iz Reigu i pavadeit naskaitomys stuņdis folklorys kruotuvē. Vīnkuoršuok ir aizbraukt vīnam cylvākam, savuokt tū vysu i atvest, kai ari vysu laiku papyldynuot, apstaiguot vītejūs teiciejus i sakruot tū vysu vīnā vītā. Leidz ar tū folklorys kūpu vadeituojim, školuotuojim, kulturys darbinīkim byutu īspieja atīt tepat, iz Dagdu, i dabuot vysu vīnuvīt.”

Inta pīzeist, ka pādejūs godūs ir nūvārojams interesis pīaugums par etnografeju i senejuom tradicejom, kurys ļauds niule gryb otkon ceļt gaismā. “Ari kuozuos mes varim nūvāruot senejūs tradiceju atdzimšonu, par kū ir ari lela prīca, jo tuos senejuos tradicejis ir ar lelu nūzeimi... Tam ir lela viesture itū ir darejuši myusu seņči na jau vīnkuorši taipat. Vysys darbeibys beja pamatuotys i tys beja sova veida rituals. Pasalelynoj ari školānu interese, bīži iz Dagdys folklorys centru grīžās ari školuotuoji ci atvad školānus, studentus… Tys ir cīši labi, jo, ja nabyutu paguotnis, nabyutu ari nuokūtnis. Tys beja svareigs myusu seņčim, tys ir svareigi mums, i mums ir juopaskaidroj deļkuo tys beja svareigs i juonūdūd ari nuokamajom paaudzem.”

Kai jau stuosteits, aizvadeituo goda golā Inta Viļuma izdavuse ari gruomotu “Dagdys pyura skreinis gruomota”, dorbs pi kurys ilga vasalus četrus godus. Tika ceiteigi vuokta informaceja nu apleicīnis ļaužu, kab leidz Latvejis symtgadei varātum Dagdys nūvoda leigovys pyura skreinē svineigi īlikt symtū prīškmatu.

“Īsasaiteja kotrs Dagdys nūvoda pogosts. Vysapyrma es uzrunuoju kulturys dzeivis organizatorus pogostūs, jo jī ir tī, kas pazeist attīceiguo pogosta amatnīkus i izaruodeja tai, ka tauta teišom ir cīši, cīši atsauceiga. Nu vysim Dagdys nūvoda pogostim atguoja koč kaidys lītys, kurys mes variejom īlikt myusu leigovys pyurā i kurys ir attīcynomys iz deveņpadsmituo godu symta vydu, t. i, iz tū laiku, kod leigovys vēļ precejuos tautystārpā, kod pyurā beja symtim zeču saadāts vysaidūs rokstūs. Jūstys, krakli, goldauti, dvīli, tys ir teišom cīši boguots.”

Dorbs pi ituos gruomotys Intai atkluoja daudzi stuostu par senejom tradicejom, ar kurom ļauds lobpruot dalejuos. Inta atkluoj, ka pyura skreinē ir daudzi seneju, viesturisku lītu, kurys ļauds atnasuši leidz ar sovys dzymtys viesturis stuostim. Sovpus gruomotyss raksteišona latgaliski deve vareibu dazynuot itūs lītu latgaliskūs nūsaukumus, tymā vydā ari tūs, kas myusdīnuos ir damiersti.

“Nabeja šaubu, ka itei gruomota byus latgalīšu volūdā i leidz ar tū gribejuos ari, kab tī vuordi izskaņ literari pareizi, jo, ka mes nūbraucam iz blokus sādžu ci kai cytvīt sauc solu, ta tī nūsaukumi izreiz mainuos, gon ari pasaruoda koč kaidi meikstynojumi, burti teik izrunuoti cytaižuok i leidz ar tū mes pīaicynojam volūdneicu Sandru Ūdri, lai jei myusus pakorigej. Suocem saleidzynuot, kai nu kurā pusē kū sauce. Vysleluokuo izbreine beja par dvīļu golūs asūšom mežginem… Kai ba mežginis, bet eipaši taids vuords natyka lītuots i es tod soku: ”Napīmiņu, pīzvaneišu taņtei pavaicuošu.” Pīzvaneju, i taņte izstuosteja, ka tuos sauce par kvarbatkom... Izaruoda, ka ari myusu pusē taids nūsaukums beja, bet niule jau ir pazuds. Tys ari ir svareigi, ka tī nūsaukumi otkon teik calti gaismā.”

***

Sižetā Gunys Igavenys atsskots iz pyrma nedelis Latgolys viestnīceibā GORS aizvadeitū divpadsmitū Latgalīšu kulturys goda bolvys padūšonys ceremoneju “Boņuks 2019”. Tei kai vysod puļcēja daudzi ļaužu, kurim latgaliskuos aktivitatis ir svareigys. Juopīzeist, ka saturiski spieceigajā nominantu konkurencē izacēle latgalīšu literatura – aizvadeitais gods īsazeimuojs ar vairuokom spieceigom gruomotom. Tūs vydā ari Annys Rancānis četru godu laikā topušais dokumentalais stuosts par kordirigentis Terēzis Brokys myužu “Aiz azara bolti bārzi”.

 

“Itys pasuokums jau seņ ir puoraudzs sovus rūbežus i jis ir ari kulturys produkts. Sovā izpiļdejumā. Jū vērtīs ir interesantai. Itūreiz maņ ir taida prīca, ka, nu juosoka, rullej gruomotys. Es pat beju puorsteigta, man lykuos, nu Egita ir peļnejuse, Ligeja ir nūteikti peļnejuse, Dagdys gruomota ari maņ cīši pateik, maņ jau vaira navbyus i ari Evijis gruomota par Vasilevski. Tai ka baumys par Latgolys gruomotys būjāeju ir cīši napamatuotys,”  par svineigū nūtikšonu stuosta Anna Rancāne.

Anna Rancāne latgalīšu literaturā našaubeigi ir spieceiga i spylgta personeiba, leidz ar tū juos pyurā jau ir vairuoki “Boņuki” par cytim juos dorbim, vys tik, kai atkluoj jei poša, itys byus eipašs. “Tys nav pyrmais, bet laikam juosoka – vīns nu taidu nūzeimeiguokūs, jo sajimt par dzeju, tys ir muns dorbs, bet ite juosoka, ka tys ir “Boņuks” na tikai maņ, bet ari bolva Terēzei. Jū atguodoj, es dūmoju, ari caur tū gruomotu jei dzeivoj… Tuos sarunys beja tik bezgola interesantys, garys, prūtams, maņ laika beja moz, īrūbežuots ar autobusu, tai nu autobusa leidz autobusam i ari piec tam mes daudzi runuojom pa teleponu. Prūtams, tuos beja ari sarunys ar juos kolegim, laikabīdrim, draugim, rodim. Ir ari daļa fantazejis, kur vajadzēja īsadūmuot, kai byutu, ja byutu. Tuos beja taidys dzeivys diveju sīvīšu sarunys… I mani tys fascinēja, ka byuteibā juos myužs ir tai kai Latvejis myužs. Jei nūdzeivuoja gondreiž vysu symtgadi.”

Redzīs, ka pasuokuma kūpejuo gaisūtne i unikalais lokalais produkts, kuru originali i taidā apmārā var baudeit tikai ite, Latgolā, uzrunoj tūs nūtikšonys apmaklātuous, kuri kasdīnā nav saisteiti ar Latgolu i latgaliskū. Sovpus poši latgalīši stuosta, ka iz “Boņuku” ir juoīt, jo tei ir breineiga īspieja vīnuvīt redzēt, dzierdēt i dazynuot vaira par zeimeiguokajom nūtikšonom latgaliskuos kulturys dzeivē, kai ari satikt “sovejūs”. Tai pīzeist ari apvaicuotī ceremonejis apmaklātuoji. “Te vysod ir suleigi, tu sajiuti taidu kūpeigu latgalīšu gora spāku. Ka tu saprūti, ka tī cylvāki, kas mums ir miļzeiga vierteiba. Par pīmāru, tod, kod Indulim Folkmanim padeve bolvu par myuža īguļdejumu, tys beja tik saviļņojūšs mirklis, tei apziņa, ka taidu cylvāku mums ir daudzi.”

“Eistineibā tei ir taida loba līta vīnu reizi godā atsavērt iz vysu, kas ir nūticss pa itū godu, giut jaunu energeju i drūsi viņ naaizmierst, kas ir tovys saknis i kas ir tova nuokūtne,” soka Ilga Šuplinska.

Kūpumā ceremonejis laikā tyka sadaleitys divpadsmit bolvys – “Žyka bolva” Latgalīšu kulturys ziņu portala lakuga.lv skaiteituoju simpatejai, myuža īguldejuma atzineiba, kai ari desmit muola statuetis spylgtuokajom aizvadeituo goda nūtikšonom ar plotuokū rezonaņsi, personeibom, kas ar sovu darbeibu populariziejuši latgalīšu volūdu i kulturu. Atsagrīžūt pi literaturys, pīcys nu desmit bolvu tyka padūtys taišņi par aizvadeitajā godā izdūtom gruomotom, divejis nu kuru ir jaunū autoru literaturys debejis – Egitys Kancānis pyrmais stuostu kruojums “Syltuo mola” i Ligijis Purinašys dzejis kruojums “Sīvīte”. 

“Tys, kū es šudiņ redzēju “Boņukā”, ka “Sīvīte” beja vīns nu tūs projektu, kas īsuoce vasalu viertini cytu projektu, vīns nu tūs ir sadarbeiba ar Danu i maņ beja cīši lela prīca ari Danu redzēs šudiņ iz skotivis. Maņ redzīs, ka mes drupeit asam tymā atmiņu i paguotnis prizmā, gruomotuos, daudz ir par tū, kas ir bejs, bet moz ir par tū, kas ir. Par tū, kaida Latgola ir šūbreid, tryukst tūs myusdīnu vaibstu,” tai Ligija.

“Boņuku” sajieme ari Intys Viļumys izdavums “Dagdys nūvoda pyura skreinis gruomota”. Sovpus ceremonejis nūslādzūšū, dasmytū “Boņuku” sajieme ari muokslys zynuotneicys Evijis Vasilevskys pūdnīkam Evaldam Vasilevskim veļteituo gruomota-izdavums “Evalds Vasilevskis”, kas viestej par keramiķa dzeivis guojumu i naatsveramū īguļdejumu Latgolys pūdnīceibā. “Es pateišom uzskotu, ka tys ir taids cīns i gūds Evaldam Vasilevskim i cytim muola vieršim. Pateikami, prūtams, ka cylvākim pateik skaiteit itū gruomotu, kas ir ari skotoma, na viņ skaitoma. Skotoma, pasasokūt Latgolys kulturviestiuris muzeja pīduovuotajom biļdem i īspiejai nūbiļdēt vajadzeigūs dorbus. Ir liels satraukums, i kai es saceju sovai draudzinei, niule jau nu pīsaīs runuot latgaliski, jo maņ ir kauns, ka es turu rūkā “Boņuku” i narunoju latgaliski, kod vajag.”

Latgalīšu kulturys goda bolvys “Boņuks” reikuotuoji Latgolys viestnīceibys GORS komanda jau ir suokuši dorbu pi cyta gods svineiguos nūtikšonys, iz kuru vysus aicynoj 2021. goda 28. februarī.