Vīns nu zeimeiguokūs nūtykumu Latvejis Republikys naatkareibys atjaunuošonā beja 1991. gods janvara barikadis Reigā, kuruos pīsadaleja ļauds nu vysys Latvejis. Deļ tam janvarī vysod atguodojam barikažu laikus i cylvākus, kuri stuoviejuši kluotyn itim viesturiski svareigim nūtykumim. Vīns nu taidu ir Augstuokuos padūmis deputats, kurš tūlaik bolsuoja par Latvejis naatkareibys atjaunuošonu, rēzeknīts Gunārs Klindžāns. 


“Pi gunkuru nasiedieju, putru navuoreju, bet tymā pošā laikā mes darejom sovu dorbu Augstuokajā padūmē. Iz tū nedeļu, iz tūs desmit dīnu jis mož nabeja tik aktivs uorā pi barikažu, tok jis beja ni mozuok svareigs. Faktiski barikažu laiks beja pūsmys storp bolsuojumu par naatkareibu de facto i storp bolsuojumu par Latvejis vaļsti de iure, kas beja piec goda 21. augustā. Barikažu laiks zynomā mārā beja naizbāgams, deļtuo ka PSRS strukturys saprota, ka Baļtejis vaļsts i vēļ daudzys cytys bejušuos PSRS Republikys ar sovim naatkareibys bolsuojumim īt uorā nu ītekmis. Īt uorā nu PSRS sastuova.”