Barikažu laikā, 1991.goda janvara vydā, vīnā nu navardarbeiguos pretuošonuos vītu Začusolā beja ari viesturis pietnīks i entuziasts, aktivais Latgolys apceļuotuojs Ēriks Začs. Tūlaik jis tī nūdzeivuojs vysmoz nedeļu. Jis izsver, ka tī tūlaik vaļdeja pacyluots nūskaņuojums, cylvāķi beja cīši atvārti i izpaleidzeigi. Sarunys laikā Ēriks lobpruot doluos sovuos atmiņuos par byušonu barikadēs.

„Praktiski es tūlaik nedeļu, varbyut drupeit vaira, naskaitejutuos dīnys, nūdzeivuoju pi ugunskura. Nabeja puoruok borga zīma. Zīma Reigā vysod nav tik borga kai Latgolā. Tūlaik lela dala tai, pi ugunskuru i dzeivuoja tū laiku. Ka beja soltuoks, tūlaik dasaguoja gulēt autobusā ci televizejis sātā. Kod beja syltuoks, varēja vīnkuorši nūlikt dieli pi ugunskura i vyss… Ar iesšonu problemu nabeja, pyrmkuort, organizāti baruoja Radio sātā, televizejis sātā. Taipat ari cylvāki neseiz tureini iedīni, maizeitis, čaju, kopeju, madu, kas nu kuram bej’, tū i nese, ari muna muote nese.”