Itūreiz Ēriks Zeps kūpā ar skūluotuoju, direktoru i vītejū nūvodpietnīku i Vladimiru Marudenoku aicynoj jius nūbraukt iz Ludzys nūvoda Istrys pogostu, precizuok – pogosta centru Vacslobodu (Vacū breiveibu).

Sovulaik Istrys pogostā dzeivuojuši 8000 dzeivuotuoju – saleidzynuojumam Ludzā tūlaik - viņ pīcys tyukstūšys. Jau nu pūļu laiku Istra bejuse izteikti boltkrīviska apleicīne. Te gon juopīzeist, ka laika gaitā boltkrīviskums puorkrīvuots. Kai zyna stuosteit Vladimirs Marudenoks, juo bierneibā kaidys treis saimis asūt sasarunuojušys latviski, bejuši puora ebreji, moza daļa zynuojuse boltkrīvu volūdu i kulturu. Vystik – jau nu 1928. goda Vacslobodā dorbuojuos Istrys sešgadeiguo latvīšu škola. Itūšaļt Istrā palykuši viņ puorsymts ļaužu. Škola slāgta, naskodejais nervu sliminīku pansionats, kur struoduojuse lela daļa mīškuonu, ari slāgts. Kai soka vītejī, dorba vītys niu ite ir viņ vītejā bārnuduorzā, veikalā i kulturys nomā.