Pīdruja ir cīms Kruoslovys nūvodā – 25 kilometrus nuKruoslovys i 292 kmnu Reigys A6 (aba Daugovpiļs–Boltkrīveja) šosejis i Daugovys molā. Iz iteini, kab vaira īpazeit Dīnavydlatgolu, myus vad multimuokslinīks, pasuokumu i raidejumu vadeituojs, kai ari Kruoslovys nūvoda Indrys muokslys školys školuotuojs Māris Susejs.

Pīdrujis ainovu veidoj rūbežkontrolis punkts, Latvejis rūbežsstobi i puori upei Boltkrīvejis mozpiļsātys Drujis sātys, lauki, meži, bazneicu i nūvāruošonys tūrni, Daugova, akmiņs, kur Daugovys nūsaukums saraksteits volūduos, kam liktiņupe svareiga, rūbežstobi, brugis, pakolni i sātys, kuru patīseibā nav nimoz tik nadaudz.

Kai soka Māris Susejs, Pīdrujis, Dīnavydlatgolys i patīseibā vysys Latgolys kolorits i breineiba sliepās tymā, ka ite mīreigi jau daudzus godu symtus kūpā pastuov, sadzeivoj i nakonfliktej dažaidys kulturys. I kotra nu tūs dūd sovu kruošņumu. Pīmāram, kūka i myura sātu arhitekturā i kruosu tūņūs, kas, Māra vuordim, ir izteikts Pīdrujis skots. Te pavysam sūpluok mīreigi stuov pareizticeigūs bazneica i katuoļu bazneica arduorzu. Pīdrujā, cyta storpā, uzjimtys ari Viestura Kairiša kinys “Piļsāta pi upis” epizodis.

Saprūtams, īdzeivuotuoju skaits te strauji saryuk, Māris nūruoda iz suopeigu tendeņci, ka ari ite – kai cytuos Latgolas vītuos – taišni školys sliegšona ir vēļ vaira īzeimiejuse cīma lānū izneikšonu. Bet vystik – ļauds te dzeivoj i darbojās i ari atsagrīž… Tuo poša mīra deļ…

Ite gon par reizi juodasoka, kab apsavērt Pīdruju, obligati ir vajadzeiga rūbežsardzis izsnīgta specialuo caurlaide.