Par Latgolys jiuru sauktais Rāznys azars, kas ir ari ar vysaidim cytim titulim boguots, kai izaruoda sliep sevī ari desmit solu, par kurom leidz šam ir runuots vysā moz. Rubrikā "Bosom kuojom" Ēriks Zeps kūpā ar Dobys aizsardzeibys puorvaļdis specialistu Daini Tuču atkluoj Rāznys azara solys.

"Maņ beja vareiba izbraukt pa Rāznu ar motorlaivu, traucūtīs ar uotrumu 70 km stuņdē. Juopībiļst, ka Rāznys azars atsarūn Rāznys Nacionalajā parkā, leidz ar tū motorlaivys pa azaru var braukt tikai ar specialom atļuovem. Kam taidu atļuovu nav, juoizmontom mozī elektromotori ci airu laivys… Rāznys solys ir sasadalejušys grupuos, četrys atsarūn Čornajis leicī, tyvuok Rēzeknis-Dagdys ceļam, bet puorejuos sešys azara pretejā pusē – Zosnys leicī. Kai pyrmū myusu turā apsaveram Balbeitys aba Augstū solu Zosnys pusē. Tī varim redzēt pyrma loba laika caltu lapeni, bet vēļ seņuok, kai stuosta nūstuosti, Muokūņkolna muižkungs tī asūt braucs dzert čaju i vērtīs iz Rāznu."

Dobys aizsardzeibys puorvaļdis specialists Dains Tučs atkluoj, ka itei ir ari turistu īcīneituokuo sola. Izsverūt, ka daudzys nu itūs solu atsarūn na viņ dobys līguma teritorejā, bet ir ari privateipašums.

"Atbraukt tu vari, ka saiminīks atļaun i uzbyuvēt ari teļti. Ka tu vysu, kū asi atveds, aizved ari atpakaļ i napīmāsloj, tod jau vyss labi. Dobai tu nikaida launuma ar itū nanūdori."

Leluoku kaitejumu solom nūdora sudobra kaijis i kormorani aba jiurys kraukli, kuri apād cīši daudzi zivu i, lygzdojūt iz solu, nūdora lelu kaitejumu kūkim i augim. Sprīžūt piec iz solu radzamūs pādu, ite var satikt ari vysaidus zvārus, kas iz iteini atmaun. Ka svēļ interesanti, sovulaik iz itūs solu ganeiti ari sātys lūpi. Sovpus cylvāku apdzeivuota ir tikai vīna sola Čornajis pusē.

"Zosnys leiča solom ir nūsaukumi – Leluo aba Apšu, Opoluo, Augstuo jeb Balbeitys, Gornivys, Līpu sola i Ezeits, kas itai beja īsaukta kūku pudureišu deļ, bet niu kormoranu deļ ir īsaukta par Nuovis solu. Čornajis leiča solom gon nūsaukumu nav."

Ka zinit vaira stuosteit par pošom solom ci zinit,kai vītēji tuos sovulaik saukuši, prīcuosimēs dazynuot.