Aizvadeitejā nedeļā ar vysaidim pasuokumim tyka svieteitys 40. Latgolys pūdnīku dīnys. Vītejim i ari vairuokim cytu regionu keramikim tei ir eipaša sasatikšonys reize, kod jī saīt kūpā i atsaver iz padareitū, kai ari sprīž par keramikys pasauļa aktualitatem i dorbim iz prīšku.  Itūreiz kūpeigais meistaru ceplis tyka kūrts pūdnīka Andra Ušpeļa keramikys darbneicā „Mōldedži”, Rēzeknis nūvodā.

Keramikys ceplis teik kūrts vysmoz padsmit stunžu – ite ir sovs laiks ari nasteidzeigom sarunom. Dazynuot Latgolys pūdnīku tradicejis i izbaudeit cepļa kurynuošynys pasuokuma kūpā byušonu beja nūbraukuse Guna Igavena.

Raidejumā varēsit drupeit īsavērt keramikys cepļa kurynuošonys procesā,  kai ari dzierdēt sarunys fragmentu ar pīredzis boguotū Kruoslovys pusis keramiki Valdi Pauleņu, kai ari sarunu ar vīneigū Olyuksna nūvoda keramikys meistaru Uģi Puzuli i Tautys lītišķuos muokslys studejis „Rēzeknes apriņķa podnieki” vadeituoju i keramiki Andri Ušpeli.