Kuorsovys nūvoda Mežvydu pogosta dobys saimnīceibys  “Ošumājas” saiminīki  Artūrs i Renāte Kaupuži naseņ atdarejuši sovys sātys durovys apmaklātuojim.  Ite var īsapazeit ar sovvalis zyrgim i amizantajim spolvainajim sovvalis lellūpim. Tai pyrma kaida laika Laura Sondore, pajāmuse leidza būrkuonus i uobeļus, brauce sasadraudzeit ar iteinis īmeitnīkim. Sovys zyrgu meitinis iz atvastajim būrkuonim sasauce saiminīks Artūrs Kaupužs. Lellūpi gon turejuos par gobolu i iz vysu nūteikūšu nūsavēre nu molys. Kai atkluoj saminīks Artūrs Kaupužs, itai pusei eksotiskī lūpeni saimnīceibā īvasti dreižuok kai napīcīšameiba, kab varātum biologiski apsaimnīkuot montuojumā nu vacuoku i vacvacuoku pamastū zemi i sātu.


Taipat Artūrs sauc nasabeit īleist aplūkā i daīt nu pyrmuo ocu skota mīreigajim i nūsvārtajim lellūpim. Sova mozuo gonompulka saiminīks ir vierss vuordā Ārnijs, kurais piec Artūra vuordu ir cīši mīreigs. Miļzeiguos spolvu pynkys, kas pasorgoj lūpeņu nu vieja, i lelī rogi gon taidu puorlīceibu naroda. I taišni lelūs rogu deļ, kurī lūpeņu transportiešonu cīš apgryutynoj, jī nav pīpraseita lūpu suga.

 
Šmukuos pļovys i lauku ainovys nasarūn pošys nu seve. Kab biologiski vierteiguos pļovys i zuoluoji napagaistu, vajadzeiga cylvāku leidzdaleiba i izpratne par itū vierteibu. Artūrs i Renāte Kaupuži ir apjiemeibys pylni i grib saglobuot vacvacuoku uzticātū montuojumu.