Latvijas radio lietotnes logo

Jolanta i Valdis Dundenīki (Dundenieki) jau vaira nakai 30 godus turpynoj i kūp Zīmeļlatgolys pūdnīceibys tradicejis. Obi stuodoj placu pi placa sovā darbneicā Bolvu nūvodā, sagloboj autentiskū Latgolys keramikys rūkrokstu laikā, kod amatnīceibā jau ir īguojuse industrializaceja i modernuos dizaina teņdencis. Jolanta jau 40 godu struodoj ari ar bārnim Bierzpilī i Gaigalovā.

Latgolys pūdnīku dīnu nūskaņuos saruna par pūdnīceibys nuokūtni, i par muola breinumainū puortopšonu, kas ir nāatjama Jolantys i Valda Dundenīku dzeivis sastuovdaļa, kas „tur i nalaiž vaļā”.

„Nasagrib īt koč kaidā modernā virzīnī, vairuok pīsaista tys tradicionalais, kas ir aizsuokts jau pošā suokumā. Pamati caur Jolantu, juos praksis školuotuoju Pīteri Iruku, vysys gudreibys jis īlyka ari manī, tys varbyut ir īspaiduojs,” soka Valdis, i Jolanta papyldynoj: „Praksē struoduoju, vuicejūs pi Pītera Iruka. Maņ ļūti patyka juo stils, juo izsmalcynuotī i graciozī dorbi. Grybūt ci nagrybūt, saguoja tai, ka mes pajamam nu sovim školuotuojim ari sovūs dorbūs koč kū leidzeigu.”

Valdis stuosta, ka saprast, kai „saīt tī greizī pūdi” var viņ tod, kod pats cylvāks paraudzeis atsasēst pi virpys i izmieginuos virpuošonys procesu. Ka kaids „palīk modernuoks, tys ir tikai normali, ka tei dzeive mainās, koč kaidys vierteibys ari mainās, bet nikur jau tys nav pazuds. Vysod ir cylvāki, kam tys patiks. Laikmets īvīš sovys korekcejis, i izvēle ari ir tova, voi pīstruoduot pi komercialuo, voi palikt tradicionālajā, tok tai nabyus nikod, ka vīta paliks tukša,” puorlīcynuots Valdis.

Struodojūt ar bārnim, Jolanta redz, ka „mozajim bārnim pateik, i cīši iņteresej darbuotīs ar muolu. Raugu apzynuot Latgolys latviskuos muokslys pamatvierteibys, i radeit iņterese par tū saglobuošonu.”

Dorbs ar muolu prosa pacīteibu, tok Jolantai i Valdim Dundenīkim tys ir sirdsdorbs: „Kod esi ar muolu, tu esi taids, kai pats ar sevi i labi jiutīs. Esi bogots cylvāks, juo muols ir zemis zalts. Bez loba gareiguo stuovūkļa, tu navari pūdus taiseit. Muols pajem, īvalk tevi, tu aizmiersti par vysom problemom.”