Šudiņ, par kinu, grimu i gleznuošonu sasarunojam ar Nacionaluos kinu bolvys „Lielais Kristaps” sajiemieju par dorbu kinai „Baltu ciltis. Pēdējie Eiropas pagāni” Aiju Beatu Rjabovsku. Latgalīti, kuruo dzymuse i auguse Rēzeknis nūvoda Rogovkā.

Aija stuosta, ka sovu ceļu muokslys dzeivē jei aizsuokuse kai gleznuotuoja, sovpus niule jau vaira nikai 10 godu juos audaklys ir dzeivs.

„Niule muni audakli ir dzeivi i runoj preteimā.

Varbyut pat vara nikai pyrma tuo, bet vysaidā ziņā ūtys ir muna kasdīna. Maņ tys vyss aizguoja cīši vīglai, i vīnā breidi as jau atskuortu, ka voi nu itys ir muns cīši duorgais hobejs, voi nu ar tū juosuoc peļneit. Sajutu vajadzeibu, vielmi i beja ari īspieja, i te es tagad asu.”

Muokslineica atkluoj, ka grimātuoja dorbs nasabeidz tik ar grima izlikšonu i atgrimieišonu.

„Tev vysu laiku juosaver i juoizpasej sagrimātī aktīri. Laikapstuokli vysuodi - zīma i soltums leidz minus 25 voi otkolnvosora i pļus 30 gradu. Korstumā ir troki, jo sveistūt var samaituot vysu grimu, tod cytureiz i ladu nosoju, i soltu dvīleiti padūdu.”

Par Nacionaluos kinu bolvys „Lielais Kristaps” sajimšonu pārnejuo goda izskaņā Aija soka tai:

„Tys maņ beja lels nūtykums, ni es par jū dūmuoju, ni gaideju, bet tys pi mane atguoja. Prūtams, ir lels gandarejums par nūviertiejumu. Kina „Baltu ciltis” beja myusu cīši gaideits, grybāts i izauklāts biernenš. Dorba beja cīši daudzu, daudzi cylvāku i sova specifika ar šū te 13. godu symta cylvāka paruodeišonu. Raudzejom eistynuot myusu prīškstotus, jo nivīns nu myusu jau jūs nabeja redziejs. Ir ciļvieceigi pateikami sajimt tik nūpītnu i atbiļdeigu bolvu, kurū tai par velļi nadūd.”

Aija struoduoja ari pi režisora Viestura Kairiša jaunuokuos kinys „Piļsāta pi upis”.

„Maņ itei kina beja īspieja atsaagrīst pi zemis, kurū es tik labi jiutu, jo, kasdīnā dzeivojūt Reigā, niu jau vaira nikai 15 godu maņ nasaīt iz ilguoka laika atbraukt, pasadzeivuot Latgolā. Tei beja taida īspieja itū vosoru pavadeit Latgolā i sajust itū zemi, tuos vibracejis, kas teišom ir sovaižuoka, i ari parunuot latgaliski, kū es kasdīnā parosti nadoru. Maņ tei beja puosoka, cīši skaists laiks.”

 

*****

Laura Sondore-Strode beja aisadavuse iz Rēzeknis nūvoda Pocelujevkys cīmu, kab pīsadaleitu vīnā nu kapelys „Dziga” mieginuojumu, kas kai īrosts nūteik keramiķa Andra Ušpeļa sātā. Sižetā vaira par kapelys aizvadeituo goda golā zdūtū, niu jau septeitū tautys muzykys albumu „Gostūs”.

 

 

 

*****

Voi Jius zinit, ka pyrmuo dzeļžaceļa staceja Latvejis teritorejā atsaroda taišni Latgolā – sūpluok Kuorsovys? Nu ietinis sovulaik varēja nūbraukt leidz Sanktpīterburgai i Varšovai. Par Kuorsovys stacejis rasšonūs i tuoluokū rūseibu tymā stuosteis viesturneica i žurnaliste Vineta Vilcāne.