Dzeja i latgaliskais cauri laikim i paaudzem, navysod seceigi. Novembra pādejā raidejumā, kas itūgod ir ari Andrejdīna, klausitēs jaunuos literatis Ligijis Purinašys sarunu ar dzejneicu i ilggadejū literaturys i latvīšu volūdys školuotuoju Līviju Liepdruvieti aba eistajā pavuordē Smirnovu. Līvija ir vīnu nu literatu, kura roksta kai latvīšu literarajā voludā, tai ari latgaliski, ari juos itūgod izguojušuo ostoituo gruommota „Pa saulis spaitu&Sirsnības ceļos” ir bilingvala.

„Latgalīšu literaturai juoatsateista, pa munam, tei vēļ ir tikai sovūs pyrmsuokumūs. Juoatsateista gon vysaidim vierzīnim, gon latgalīšu literaturai pošai.”

Liepdruviete ir Līvijis dzejis pavuorde jau nu pyrmuo dzejis kruojuma „Mirkļu mozaīka”, kas izguoja 1999.godā. Dzejneica stuosta, ka tys pi juos atguojs lykumsakareigi, šaļtī, kod beja juoizdūd kruojums ar jauneibys pavuordis laikūs topušim dorbim, asūt jau veira pavuordē.

„Tys beja laiks, kod es vaira nabeju sovā jauneibys pavuordē, kas maņ beja Benislavska, bet beju jau veira pavuordē. Tai sasagadeja, ka, asūt Juoņa Eļkšņa aba Latgolys kulturys centra izdevnīceibā, suocem runuot par jaunuoku literaturu, i jis maņ īsaminieja, ka tikū kai ir izguojuse dzejneicys Paulīnis Zalānis pyrmuo dzejūļu gruomota, koč ari itei sīvīte jau ir krītni godūs. Jei asūt beidzūt uzadrūšynuojuse izdūt sovu dzejūļu kruojumu „Cilvēka ceļš”. Tod ari es īsaminieju, ka rokstu dzejūļus, koč ari raksteju tūs jau cīši seņ, nu kaidys 5., 6. klasis. Varbyut raksteju jau ari agruok, bet itys ir tys vacums, ka es jau suoku pīraksteit jūs kladeitē. Jis maņ soka, nu paruodi. Es ari tuos kladeitys beju atnasuse, tai ari topa muns pyrmais kruojums „Mirkļu mozaīka”. Lai nabyutu abižavuoti ni vacuos pavuordis puorstuovi, muni seņči, i nabyutu ari maluots, ka itī dzejūli ir raksteiti asūt jau Smirnovai, jo dzejūli pamatā topa vydsškolys laikā. Tod es īsadūmuoju, ka varātum jimt dzejis pavuordi – Liepdruviete. Munam vactāvam beja foļvarka „Līpu dryva” i tī vys vēļ tei sāta ir, i ari zeme pīder maņ. Nu ituo vysa vot i asu Liepdruviete.”

Līvijis pyurā ir pavysam ostoni kruojumi, leluokuo daļa nu kuru saraksteiti latvīšu literarajā volūdā, vys tik pa reizei jei roksta ari latgaliski. Kai pīzeist poša autore, tod latgaliskais jai vysod ir bejs kluotasūšs i tyvs.

„Latgalīšu volūda maņ suoce atsagrīzt jau ar pošu pyrmū dzejūļu kruojumu – es nazynu, vīnkuorši taids kai dvēselis saucīņs. Tys latgaliskais vīnolga kotram latgalīšam ir īškā, koč kur īzeists ar vacvacuoku pīnu.

Eistineibā jau Latgolā mes asam dyžani sajaukti i saceit, ka asam teiri latgalīši ci latvīši navarim. Latgaliskais, latvyskais, pūliskais – tys vyss koč kur ir sajaukts iteinis ļaudīs.”

Vaicuota par latgalīšu volūdu i tuos lītuošonu kasdīnā Līvija pīzeist, ka poša saimē runoj gon latvīšu literarajā, gon latgalīšu, gon ari krīvu volūdā.

„Sevkurai volūdai, ka jei ir dzeiva, ir juosapylnveidoj, juoatsateista i varbyut ari juoatsateirej nu līkuo, navajadzeiguo. Kotrā volūdā ir līkais, nu kuo juoatsabreivoj, jo ari latvīšu volūdā sovulaik mums beja tik daudz rusicismu, kuo tik tī nabeja. Niu mes otkon asam puorguojuši iz tū, ka cīši daudz lītojam angļu vuordus, kai ba namonūt, kai ba tys byutu myusu, bet nav. Nav. I tūs eistūs latgaliskūs i latvyskūs vuordus pabeidam koč kur molā.”

Līvija atkluoj, ka stuostu ci romanu raksteišona jū eisti nasaista, jo tī ir regulari juosiež i juoroksta ilgu laiku, ar dzeju tys ir drupeit cytaiži. Līvija pīzeist, ka dzejis ailis pi juos īrosts atīt nagaideitai. „Nagaidūt. Ir breiži, ka es vys tik jim ļaunu aizskrīt atpakaļ, nu kureinis jī guojuši. Varbyut kaids cyts sagiun jūs kaidā breidī, jo ja tuos ryndys nateik pīfikseitys, juos koč kur aizīt. Juos napalīk i, ka juos atīt otkon, ta juos jau ir drupeit sovaižuokys. Varbyut skaistuokys, varbyut nā, bet tuos jau ir cytys ryndys.

Braucūt ar mašini, es raugu nanūvierzeit dūmys nu ceļa i braukšonys, i pamatā tod narokstu, bet ir bejs ari tai, ka vys tik juopīstuoj koč kur maleņā i juopīroksta puora rindenis.”

***

Sižetā Silvija Smagare pastuosteis par Evijis Vasilevskys izdūtū gruomotu „Evalds Vasilevskis (1953–2018)”. Leidz ar gruomotys prezentacejis nūtikšonu Marka Rotko muokslys centrā Daugovpilī tyka atkluota ar Evalda Vasilevska keramikys izstuode „Māla sajūtas”, kas tī niu byus apsaverama leidz 2020. goda 19. janvaram.

 

***

Itūreiz gromotplauktā literats Oskars Orlavs aba Raibīs īsavērs Ligijis Purinašys debejis dzejis kruojuma „Sīvīte” puslopuos.