Dzīšmu stuostu rubrikā dzīšmu kruojuma “Muna dzīšmu gruomota” sastateituoja Edeite Laime itūreiz atkluos dzīsmis “Svāti zvoni sazvaneja” stuostu.

Dzīsmi “Svāti zvoni sazvaneja” popularu sovulaik 90. godu golā padareja taids legendarais duets kai Mildeņa Nabeņa i Skaidreite Krāniņa, aiz kuru globuojās akteri Juoņs Jarāns i Daiņs Porgants. Akteru i humoristu duets sovulaik beja cīši populars vysā Latvejā. Kai stuosta akters Juoņs Jarāns, kura saknis ir Latgolā – juo mama īt nu Baļtinovys pusis, bet tāvs nu Aglyunys – tod duetā tys leluokais dzīduotuojs i muzykaluokais daleibnīks beja Skaidreite aba Daiņs Porgants, bet Jarāns naasūt nikaids dzīduotuojs, tok “Svāti zvoni sazvaneja” dueta repertuarā bejuse cīši eipaša – vīneiguo dzīsme latgaliski i vīneiguo, kur solists vīns pats bejuse Mildeņa jeb Jarāns.


Itū dzīsmi rubrikas veiduotuoja Edeite Laime atguodoj nu bierneibys i vysod tai i dzīduojuse leidza, ka “Svāti zvoni sazvaneja”, tok tik daudzi vāluok izaruodeja, ka tī svātī zvoni eistineibā nav nimoz tī svātī, bet ir svuotu jeb tautu zvoni – zeime i laiks, kod kaidai jaunai meitinei sabrauc precinīki.


Bet, ka pasaver viesturē, tod senejuokuos līceibys, kurys īsadevs atrast par itū dzīsmi, ir nu niu cīši tuoluo 1896. gods. Tymā godā Reigā izdūtajā zineibys i rakstnīceibys mienešrokstā “Austrums” ir roksts par Inflanteju aba Pūļu Vydzemi – myusu dīnu Latgolu –, kurā stuosteits ari par pošys tautys sacarātom dzīsmem i pīsaukts “kaidys jaunivis ražuojums, kas cīši raksturoj inflantīšu dzeivi”. Dzīsmē, kas suocās ar vuordim “Es meiteņa gonūs guoju”, bet tuoļuokī panti skaņ kai “Svātim zvoni sazvaneja, muote mani sabraneja” – tei poša dzīsme, kura Mildenis i Skaidreitis kasetē īraksteita vasalu godu symtu vāluok.


Latvīšu folklorys kruotivis pietneica Beatrise Reidzāne stuosta, ka itei dzīsme Latgolā bejuse cīši pazeistama, tok folklorys i tautysdzīšmu pietnīku uzmaneibu leidz pat 90. godu nasaistejuse, jo naasūt bejuse tautysdzīsme klasiskā izpratnē, taida nu ziņģu i sacarātūs dzīšmu kategorejis, kū tūlaik zynuotnīki napieteja. Taida ļusteiga dzīsme, kas dzīduota kuozuos, tolkuos i cytuos saīšonuos. Ari niu digitalajā arhivā garamantas.lv var atrast cīši daudzi i vysaidus dzīsmis variantus kai vuordūs, tai melodejā, tai ari pīdzīduojuma dalis var byut vysaidys. Vysu vaira gon itei dzīsme atrūnama kai “Moza beju gonūs guoju” – leidzeigi kai tymā senejā “Austruma” rokstā. Rokstā publicāta dzīsmis verseja ar vasalim 15 pantim.
Tiuleņ piec nedelis oktobra vydā tiks svieteiti Vysusvātuos Dīva muotis Patvāruma aba Pokrova svātki. Tī teik pīmināts ari vīns nu dzīsmis paņteņu.


Atliksim mes kuozas tuoli,
Vēļ pa mozu zūsis, cuoli.
Vucinei gon ir jau vylna,
Bet ola nava eistyn pylna.
Pēc Pokravas tū svādīni
Tod es byušu vys gotova,
Tod es byušu eistyn tova.

Taišni iz Pokrova tiergu 15. oktobrī Pūderovā aicynoj ari Rēzeknis nūvods. Itymā tiergā ari sūlej na viņ tiergavuošonu, tok ari dzīsmis. Pietneica Beatrise Reidzāne stuosta, ka sovulaik tiergūs asūt daleitys dzīšmu lapenis, kas bejušys cīši popularys, deļtuo dzīsmis ari tai labi izaplatejušys tautā. Sprīžūt piec ituos dzīsmis sasaglobuošonys ari vāluokuos versejuos, vysā tycams, ka ari itei ir vīna nu tierga lapeņu dzīšmu i Latgolā dzīduota bīži i daudz.


Bet kur dzīsmi nūsaklauseja akters Juoņs Jarāns? Jis soka, ka vaira precizi napīmiņ – var byut, ka muote dunguojuse, var byut kaiduos kuozuos Latgolā dzierdāta, bet leidza ar kaseti “Mildiņa un Skaidrīte iziet medībās” i piečuokajom koncertprogramom dzīsme otkon palykuse cīši pazeistama. Taišni itaidā versejā 2002. godā dzīsme izskaņ ari dueta “Inga i Normunds” latgalīšu dzīšmu albumā “Tuoli dzeivoj”.