Dzīsmis “Gotovs beja”, par kurū muzikis i pasuokumu producents Ēriks Zeps i latgaliskūs projektu vadeituoja i dzīšmu stuostu entuziaste Edeite Husare runoj itamā reizē, stuosts ir pylns gara ceļa, jo taidu dzīsmis variantu, kaidu dzieržam itūšaļt, pietnīki sovulaik atvaduši nu Sibira.

Dzīsmis motivs, kū latvīšu literarajā variantā var atrast ar vuordim “gatavs bija kara vīrs” ci “kara puisis” sovulaik Latvejis teritorejā beja cīši populars i taišni taids 19. godu symta golā leidza ar latgalīšim tyka da Sibira. Latgalīši tymā laikā brauce iz Sibiri pīsadaleit dzeļža ceļa ceļšonys dorbūs i piečuok ari palyka tī iz dzeivi, jo Sibirī dabuot zemi, kas tūlaik Latgolā (Vitebskys guberņā) beja cīši gryuši.

Var saceit, ka dzīsmis atpakaļ ceļš iz Latveju suocīs 20. godu symta 70. godūs, kod aizasuoce interese par Sibirī dzeivojūšajim latvīšim i piečuok, jo eipaši jau 2000. godūs, kod itai pietnīceibai pīsavierse zynuotnīki i tyka reikuotys daudzys ekspedicejis. Taišni itys dzīsmis “Gotovs beja” variants 2004. godā atvasts nu Sibira cīma Timofejevkys, kur folklorys ekspedicejis pietnīkim jū īdzīduojuse cīma īdzeivuotuoja Beņa Vilcāne. Timofejevka izaveiduojuse ap 1895. godu – 20. godu symta suokumā tī beja pat 14 saimisteibu, tei beja vīna nu vacuokūs i leluokūs latvīšu/latgalīšu koloneju Sibirī.

Koč i Timofejevkā, kuruos īdzeivuotuoji pamatā beja Ludzys apriņča izceļuotuoju piecteči, tautysdzīsmis dzīduotys moz, ekspedicejā īsadevs fiksēt mozuok nakai 10 taidu, leluokuo daļa bejs goreigūs dzīšmu repertuars, vys tik “Gotovs beja” myusu laikūs otkon teik dzīduota vysā Latvejā – jaunys versejis tai radejuši “Dziga”, “Sovvaļnīki”, “Saucējas”, “Grodi”, apvīneiba “Sventava”, ari Rēzeknis nūvoda vokaluo studeja “Skonai” i cyti.

Dzīsmē “Gotovs beja” var dzierdēt kai vuordus, kurūs myusu laikūs vaira nalītojam, par pīmāru, “gruomota”, kas myusu laikūs ir “viestule”, tai naīrostys volūdys formys – ļauda-ja-veņa, taipat ari sižetā tei viestej par laiku, kod armejā puiši i veiri tyka īsaukti až iz 25 godi, kas mums, koč i dzeivojam dīnuos, kod otkon dīvamžāļ kars i armeja ir dzeivis parādā, vys tik ruodīs naīdūmuojams.