Maja suokumā dzeivuojom leidza Eirovizejis dzīšmu konkursa nūtikšonom, bet voi kaidu reizi konkursa viesturē ir skaniejuse latgalīšu volūda? Par tū Edeite Laime pastuosteis ituos reizis rubrikā “Dzīšmu stuosti”.

Vīns nu aspektu, kaidūs var runuot par mozuok lītuotajom volūdom i tūs atteisteibu ir: kod pyrmū reizi kaida volūda izskaņ Eirovizejis dzīšmu konkursā. Latgalīšu volūda ari ir vīna nu pasauļa mozuok lītuotūs volūdu, deļtuo ituos reizis raidejuma “Kolnasāta” rubrikā stuosts ap latgalīšu volūdu i latgalīšim Eirovizejā.

Cytugod byus jau 25 godi kai Latveja pyrmū reizi pīsadaleja Eirovizejis dzīšmu konkursā, bet cik reižu itūs godu laikā Eirovizejā ir skaniejuse latgalīšu volūda? Storptautyskajam konkursam vyss vēļ prīškā, bet Latvejis nacionalajā atlasē tei bejuse taišni vīna reize, kū sovulaik, 2008. godā, saryupēja grupa “Borowa MC” i jūs dzīsmis gosts Kristaps Rasims, kūpā dzīžūt skaņdorbu “The One”. Bet izaruod, ka pyrma grupa jau beja raudzejuse tikt nacionalajā atlasē ar sovulaik sovu popularū dzīsmi “Baba Toņa inženers”.

Kai “Kolnasātai” stuosta grupys “Borowa Mc” liders Aigars Runčis, kurs cyta vydā garus godus beja ari raidejuma vadeituojs, grupai nabeja lelūs Eiropys īkaruošonys planu, caur dzīšmu konkursu vaira dūmuojuši par vītejū auditoreju i vītejū skotivi. “Pyrmū reizi Eirovizejis dzīšmu konkursa nacionalajā atlasē raudzejom startēt ar dzīsmi “Baba Toņa inženers”, bet natykom konkursa daleibnīku vydā. Tys beja laiks, kod grupa beja iz popularitatis viļņa, pošim ruodejuos, ka varātu ar itū dzīsmi labi startēt naviņ nacionalajā atlasē, bet varbyut tikt pat iz Eiropys skotivis. Tok žureja uzskateja, ka dzīsme nav cīneiga byut konkursa dzīšmu vydā, koč ari piečuok tei palyka par vīnu nu leluokūs grupys hitu,”  par pyrmū raudzeišonu pīsadaleit Eirovizejis dzīšmu konkursā stuosta Aigars Runčis. Piečuok, kod tyka raudzeits startēt ūtrū reizi, kai Aigars nūsmej, grupa izdarejuse piļneigi navajadzeigu lītu – rakstejuse dzīsmi Eirovizejai, bet kod taids ir mierkis, nikas dyžans nu tuo nasaīmūt. “Tū pīroksti stypri viduveju dzīsmi, kurū piec godu vaira nav vārts atguoduot i runuot. Taišni tai saguoja ari ar dzīsmi “The One”, tai i tei palyka izskanējuse viņ Eirovizejā. Piečuok ni koncertūs, ni kur cytur vaira naasam spieliejuši,” soka Aigars.

Piec “Borowa Mc” Eirovizejis pīredzis latgalīši konkursā ir raudzejuši pīsadaleit ari cytus godus. Laurys Bicānis izpiļdejumā dzīsmis “Es tikai ļaujūs” angļu volūdys verseja “Freakin’ out” konkursa nacionalajā atlasē skanēja 2012. godā, bet vēļ vīna reize, kod latgalīšu grupa pīsadaleja konkursā beja projekta “Kapļi” voi kai jī sevi nūsauce Eirovizejis vajadzeibom “Die Mattoks” dzīsme “XXL”, kurei tautā lobuok zynoma kai “Legingi nav biksi”. Dzīsme vuocu volūdā nacionalajā atlasē skanēja 2015. godā. Kai Laurys Bicānis, tai i “Kapļu” dzīsmis Eirovizejā latgaliski naskanēja, ari piečuok nivīns muzikis, kū vaira pazeistam ar dzīduošonu latgaliski, nav raudzejs īkaruot lelū konkursa skotivi – voi vysmoz nav tics da konkursa daleibnīku vyda.