Ar Rēzeknis Tehnologeju akademejis profesori i filologejis doktori Sanitu Martenu ruonuosim par myusu dīnu latgalīšu volūdys tekstu korpusa (MuLa) mierki, lītuošonu i niu pi tuo īplanuovuotajim i tyvuokūs diveju godu laikā doramajim dorbim.


Sanita stuosta, ka sevkurs volūdys korpuss, taipat ari itys, ir strukturāts tekstu i/voi atšifrātu runys īrokstu kruojums, kas paradzāts lingvistiskai analizei. Tys dūd vareibu veikt vysaiduos pietejumus, kai ari sekmej volūdys izpieti, sasaglobuošonu i atteisteibu. MuLa ir sevkuram interesentam breivai daīmams škārsteiklā: http://www.korpuss.lv i http://hipilatlit.ru.lv.