“Kolnasātys” gruomotplaukta rubrikā latgalīšu kulturys ziņu portala lakuga.lv redaktore Laura Melne pastuosteis par 2024. godā pyrmū latgaliski izguojušū gruomotu – rakstnīka i literaturzynuotnīka Valentina Lukaševiča “Dīnvydlatgolys stuostim”.

“Latgola nav moziņka, Latgola ir dažaida i lela. Ir kolnu i leidzonomu Latgola. Dīnvydu i zīmeļu, reitu i vokoru. Vyds Latgola. Lelpiļsātu i lauku. I tai var i tuoļuok,” tai gruomotys “Dīnvydlatgolys stuosti” īvodā roksta tuos autors Valentins Lukaševičs. Jis pīrakstejs 39 stuostus taišni par Latgolys dīnavydu daļu i aizdūd skaiteituojim vaicuojumu par vuordu salykumu “apdzeivuota vīta” – voi var dzeivuot bez vītys i voi vīta ir ari tod, kod nivīns tī nadzeivoj?


Jaunajā gruomotā Lukaševičs plašuokai publikai atkluoj vēļ vīnu sovys daudzpuseiguos personeibys škautni – jis ir na tik spūdrs literats i literaturys puorzynuotuojs, tok ari sovā ziņā nūvodpietnīks ituo vuorda vyspuoruokajā pakuopē, cīši erudits par Latgolys kulturviesturis nūtikšonom, personeibom, vītom. Kod apsavīnoj boguoteigs faktu kruojums i stuostinīka talants, rūnās izcyls gids. Taidus mes varim satikt ari Latgolā, vodūt ekskursejis, tok “Dīnvydlatgolys stuosti” dūd unikalu vareibu ar taidu gidu autora personā vysapyrma apceļuot itū regiona daļu sovā pruotā, skaitūt gruomotu. Voi piečuok gribēsīs aizbraukt ari eistā ceļuojumā? Vysdreižuok, ir kaidu daļu nu vītu, jo vysys pat vairuokuos reizēs gryuši īspēt.
Ruodīs, ka itei nabyus gruomota, kuru puorskaiteit vīnā pīguojīnī – nu vuoka da vuoka. Byus, kai myusu dīnuos soka, puoruok daudz informacejis. Juoskaita pa gabaleņam, tok, grybātūs saceit, ka vys tik piec kuortys. Lai ari gruomotā var atrast i popularzynuotnyskys enciklopedejis, i turysma ceļveža pazeimis, es tū vysapyrma pīskaiteitu pi literaru dorbu, kas prosa zynomu skaiteišonys seceibu, na svadeišonūs pa sev vaira interesejūšom vītom. Daļa “Dīnvydlatgolys stuostu” pyrma tuo publicāti presē, tok gruomotā ar muokslineicys Inesis Dunduris paleidzeibu vēļ precizuok sastrukturizāti i boguoteigai ilustrāti ar kai autora poša uzjimtom, tai viesturiskom fotografejom, izceļūt taišni pošam Lukaševičam vyssvareiguokū par konkretū vītu.


Autors pīzeist, ka “Dīnvydlatgolys stuosti” jam ir kai atsazeišona mīlesteibā tai Latgolys daļai, kas atspīgeļuota gruomotā. I eistyn var just. Par piļsātom jis roksta moz, atsevišks stuosts veļteits Preilim, vairuoki – vysaidom mozuokom Daugovpiļs i Kruoslovys daļom. Pamatā tī ir lauku pogostu centri voi vītys, kur atsarūn īvārojami dobys voi kulturviesturiski objekti. Lukaševičs daudz kū ir apceļuojs ar sabīdryskū transportu, lelus gobolus nūīmūt ari kuojom, kas ļaun iz daudz kū pasavērt cytaižuok, nakai verūtīs pa mašynys lūgu – pamaneit tū, kas uotrumā paskrīn garum. Autors vysur izceļ kai vītys, tai tūs cylvākus. I poša satyktūs, i viesturiskys personeibys – kai labi zynomys, tai napeļneitai damierstys. Iz daudzom vītom jis pasaver pavysam cytaiž, kai varbyut īrosts, prīškplanā izlīkūt na tū, kas iz turysmu bukletu vuoku, tok nazkū pavysam cytu – na mozuok vierteigu, bet varbyut pat vēļ vierteiguoku?


Lukaševičs pavysam nūteikti ir latgalīšu volūdys meistars – juo volūda ir dzeiva. Tei nav ni puorlatvyskuota, ni muoksleigi puorlatgaliskuota, raugūt atrast senejuokys formys, bet pagaisynojūt poša autora izteiksmi, kai šaļtim gadejīs cytim literatim, tok reizē tamā var saredzēt vysaiduoku Latgolys izlūkšņu īzeimis, ar kurom autors apzynuotai voi naapzynuotai spielejās. Volūda ir vēļ vīna “Dīnvydlatgolys stuostu” pīvīnuotuo vierteiba. Kai eipaša ūdzeņa – šaļtim tekstā vīnam i tam pošam vuordam teik pīduovuotys divejis formys, senejuokū īlīkūt īkovūs ar atsauci, ka “seņuok saceitu tai”.
Dīnavydlatgola niu var justīs cīši lapnai, ka par tū pīraksteita taida gruomota. Tys ir pīruodejums tuos boguotajai viesturei, daudzveideigajai dobai, īspaideigajai arhitekturai i vysvaira – īvārojamajim ļaudim. Koč kū leidzeigu byutu peļnejušys ari puorejuos Latgolys dalis. Juotur nūceja, ka Valentins Lukaševičs sakruos ari Zīmeļlatgolys i Vyds Latgolys stuostus.