"Kolnasātys" rubrikā "Gruomotplaukts" Laura Melne turpynoj stuosteit par latvīšu literarajā volūdā saraksteitom gruomotom, kuruos var atrast ari koč kū nu latgaliskuo. Itūreiz īsavērsim rakstneicys Agnesis Zarānis divejūs dorbūs: romanā "Slīdošās kāpnes" i stuostu kruojumā "Laba meitene".

Agnese Zarāne ir jauna rakstneica, kurai izdūtys divejis gruomotys. 2019. godā izguoja juos debejis romans jaunīšim "Slīdošās kāpnes" i ituo gods suokumā – stuostu kruojums "Laba meitene", kas vīnleidz varātu interesēt i jaunīšim, i jau drupeit nūbrīdušuokim pruotim. Parkū mes varim par itim daiļdorbim runuot latgalīšu literaturys kontekstā? Vysupyrma, Agnese Zarāne poša ir latgalīte. Jei dzymuse Ludzā, izauguse Rēzeknē, tok niu jau vaira nakai desmit godu dzeivoj Reigā. Ūtrkuort, juos dorbūs nareši teik apraksteita taišni Latgolys vide – tei var byut kai stuosta centralais elements, tai ari atrūnama pavysam seikuos, tok zynuotuojam radzamuos detaļuos.

Romans "Slīdošās kāpnes" viestej par vydsškoļneicu Signi, kura 12. klasē puorsaceļ nu Ludzys iz Reigu. Tū nūteikti var nūsaukt par pīaugšonys stuostu, kurā tuos golvonajai varūnei juoteik golā ar sovim personeigajim, kai ari sovu vacuoku attīceibu leiklūčim, juopījem lāmumi par izvēlem iz prīšku, kai ari juosaprūt, voi mes poši sovā dzeivē asam viņ akteri, kū voda kaids cyts, voi ari režisori, kas poši īstudej sovys lūmys. Latvīšu autori nav cīši leli jaunīšu romanu raksteituoji, partū ir prīca skaiteit vītejū vidi atspīgeļojūšu romanu. Vīneigi vysā labi apraksteitajūs tālūs atpazynu sova laika jaunīšu paaudzi, kas školu pabeidze pyrma ostoņu godu. Nav šaubu, ka ar romana tālu problemom identificētīs var ari myusu dīnu jaunīši, tok poša vide ruodīs jau vītom drupeit pagaisynuojuse aktualitati.

Koč ari gruomotys golvonuo varūne Signe ir nu Ludzys, jei poša narunoj latgaliski. Romanā ir pīmynāti i stereotipi par Latgolu, atsarūn ari kaids latgalisks vuords i atsauce iz legendarū dzīsmi "Kod latgalīts Reigā brauc". Tok nu munys pusis par ituos gruomotys latgaliskū bonusu gribīs saukt drupeit apraksteitū jaunīšu dzeivis vidi Ludzā, kas jiutami atsaškir nu Reigys. Eistyn var nūgiut sajiutu, ka es tī asu bejuse i tū pīdzeivuojuse, saleidzynojūt ar pošys pīredzem vydsškolys vacumā Latgolā. Nav obligati juoroksta latgaliski, kab sasajustu kai Latgolā.

Tok latgalīšu volūdu mes varim atrast ūtrā Agnesis Zarānis gruomotā "Laba meitene", kurā skaitami 11 stuosti par dažaidom sīvītem, kuruos vysys vīnoj gribiešona byut lobom meitinem piec rodu, draugu, sabīdreibys dūmu. Juos ir dažaidu vacumu, tok ari itūs maņ grybātūs saukt par pīaugšonys stuostim, partū ka pīdzeivuot īškejū izaugsmi mes varim sevkurā vacumā. Izaugt no ramu, kurūs myus īlykuši cyti, nu stereotipu, kurūs vēļ dzeivoj lela daļa sabīdreibys. Ari itamā gruomotā autore izmontoj nalelys atsaucis iz Latgolys vidi voi cylvākim, tok par eistyn latgalisku es grybātu saukt stuostu "Babeņa", kas pīraksteits latvīšu literarajā volūdā, tok Latgolys babenis i juos mozmeitys sarunys pamastys latgaliski. Stuosts rysynojās pyrmuo Covid-19 pandemejis viļņa laikā i dokumentej kai ba tik naseņ bejušu laiku, kas nu jau ruodīs pavysam cytaids. Škārsteikla vītnē "Goodreads.com", kur gruomotu skaiteituoji nu vysa pasauļa var atzeimuot sovys puorskaiteituos gruomotys, tuos vierteit i raksteit atsauksmis, par tū, ka Agnesis stuostā ir tik latgaliskuo teksta bez tulkuojuma, var atrast vairuokus naapmīrynuotus redzīņus. Nu pošys autoris nūskaidruoju, ka cytureiz jei drūši viņ dūtu tulkuojumu vysmoz dažim mozuok zynomim vuordim. Varbyut tys eistyn byutu lobuokais rysynuojums, kai pīradynuot cylvākus pi latgaliskajim tekstim, tok nu ūtrys pusis – nav dzierdāts, ka kaids praseitu tulkuot latgaliskuos dzīsmis, kas nu jau gona daudz skaņ ari radejuos.

Dūmojūt par stuostu kruojumu "Laba meitene", gribīs viļkt zynomys paralelis ar divejom cytom itūgod izdūtom gruomotom: Annelis Slišānis "tuoraga stuostim" i Sandrys Ūdris "Tīsys syla bolsim". Maņ ruodīs, ka tuos vysys ir taidys leluokā voi mozuokā mārā terapeitiskys gruomotys sīvītem ituo vuordu salykuma vyslobuokajā nūzeimē. Tu vari izīt cauri cytu sīvīšu dzeivem, kab lobuok pasavārtu iz sovejū. Tev nav juoatbylst cytu prīškstotim, juoatkuortoj sovys dzymtys sīvīšu klaidys i juosabeist pošai nu seve. Tu dreiksti dzeivuot tai, kai tu gribi.