Par vīnu nu ražeiguokajom latgalīšu literaturys autorem palykuse rakstneica i tekstilmuokslineica Annele Slišāne. Jei aizvadeitūs četru godu laikā izdavuse treis gruomotys i turpynoj struoduot pi jaunu dorbu. Raidejuma Kolnasāta rubrikā "gruomotplaukts” Annelis dorbūs īsavēre Laura Melne.

Annele Slišāne daudzus godus beja labi zynoma kai muokslineica, vīna nu talanteiguos Slišānu saimis puorstuovem. Ari juos naparostū Latvejis symtgadei veļteitū projektu #100dečiLatvijai suokumā gribiejuos vaira uztvert kai tekstilmuokslineicys izaicynuojumu – diveju godu laikā nūaust 100 deču – kotru nu atškireiga materiala. I materiali beja vysvysaidi, kai tradicionaluoki, tai tik natradicionali kai videokasešu lentys, telefona austenis voi egleišu lampeņu vērtinis. Tok, ruodīs, ka itymā projektā Annele tai pa eistam pīdzyma kai rakstneica, i golā izguojušuo gruomota #100dečiLatvijai beja ari ar augstu literarū vierteibu. Zeimeigai, ka tū juos augšonys procesu var just ari, puorskaitūt itū gruomotu. Pi kotra deča, kuri gruomotā sakuortuoti hronologiskā seceibā, ir sovs stuosts. Pyrmī puorsvorā ir latvīšu literarajā volūdā, tok procesā vyss puorsamej i beiguos proporceja jau ir pavysam cytaida – gondreiž vysi stuosti jau ir latgaliski. Annele roksta sovā Zīmeļlatgolys izlūksnē, kas redaktoris Ilzis Spergys vadeibā ir pīlāguota latgalīšu pareizraksteibys normom. I tys ir cīši lels īgivums. Annelis volūda ir ari juos rūkroksts i, ruodīs, pat poša par sevi palīk par muokslinīcyskuos izteiksmis leidzeikli. Deču stuosti ir sajiutu stuosti, kū nu kotrs nu materialu ir lics autorei sajust. Tuos var byut nalelys impresejis, bet puorsvorā ir Annelis pošys bierneibys atminis. Juos dzymtuo izlūksne tuos padora tik dzeivuokys. #100dečiLatvijai ir eipaša gruomota ari ar tū, ka sagataveiti kai tuos audiostuosti, kū īrunuojuse poša Annele, tai ari tei izdūta braila rokstā i videogruomotā zeimu volūdā. Zīmeļlatgolys izlūksnē Annele ari turpynoj raksteit.


Ka iz deču stuostu var vērtīs i kai iz muokslys projektu, i kai literaturu, tod nu jau divejis izguojušuos “tuoraga stuostu” gruomotys vaira paruoda Anneli Slišāni kai rakstneicu, lai ari jei veiduojuse ari tūs ilustracejis. “tuoraga stuosti” ir 13 eisī stuosti kai par bīzpīnu aba tuoragu, tai par sīvītem. Gruomotu kūpumā var uztvert kai pīaugšonys stuostu – kai nu ryuguļa var atsiļdeit bīzpīnu, tai nu suopeigys i napateikamys pīredzis var rastīs kas jauns. “tuoraga stuosti” izguoja gondreiž reizē ar Sandrys Ūdris stuostu kruojumu “Tīsys syla bolsi”, kas runoj par cīši leidzeigom temom – sīvītis lūmu sabīdreibā, emocionalu i fizisku vardarbeibu. Tī nav vīgli skaitami stuosti – tī ir daudz suopu i kauna, ar kū, pa manim, var identificētīs sevkurs cylvāks, na tik sīvītis. Tok beiguos ir sajiuta, ka vyss byus labi. Taids kai aicynuojums i styprynuojums, ka var ari dzeivuot cytaižuok. Var izīt caur guni, tikt pi tuoraga. I tod jau poša sīvīte var izlemt, kū ar tū tuoragu dareit tuoļuok – jaukt ar kriejumu, ceipt peirāgu voi sīt sīru. Ari ite rūnās sajiuta, ka Annele roksta par sevi, i tys nav tik Zīmeļlatgolys izlūksnis dieļ. Tok tei ir tik daleja patīseiba – jei poša sacejuse, ka tī ir nu dzeivis, jei ir bejuse ituom situacejom kluotyn, tok tī vysi nav par jū pošu, lai ari pošys izdzeivuoti voi leidza puordzeivuoti.


Kai nūsaceits turpynuojums itai gruomotai naseņ izguoja “ Tuoraga stuostu” ūtruo gruomota, kam dūts apakšnūsaukums “pīns”. Ar tū Annele Slišāne debitej ari kai dzejneica – pa vydu stuostim ir ari vairuoki dzejūli. Itys stuostu kruojums ir par suokumu – cylvāka suokumu, sīvītis suokumu kai muotei. Tymā piļneibā atsakluoj autoris miļzeiguo empatejis spieja – na tik leidzpuordzeivuot pošai, tok ari nūdūt tū skaiteituojam. Dažaidu paaudžu sīvītis, dažaidys tūs dzeivis pīredzis, tok ruodīs, ka tu juos vysys saprūti. Šaļtim tu spiej na tik just leidza, bet pat identificētīs ar jom. Pat tod, kod poša naasi muote i nazyni, kai ir tai byut. Annele sovūs stuostūs doluos ar vysaidu sīvīšu pīredzem – jei jom īdūd bolsus. Tok jei nanūsūda i navuica nivīna dzeivuot. Jei ļaun skaiteituojam izdzeivuot cytys dzeivis i pošam izdareit secynuojumus. Ka pyrmuo gruomota beidzās ar cereibu, tod “tuoraga stuosti. pīns” jau ir daudz smoguoka. Jau tuos suokumā autore pasoka, ka “cytu reizi pīns ir saskuobs i nikam vaira nader. I tod nikuo”. Tok tū var uztvert ari kai aicynuojumu dareit vysu, kab itys naatgrīzeniskais process nanūtyktu. Dareit vysu, kab pīns nasaskuobtu. Iz tū Annele ari aicynoj sovūs dorbūs – “Pīdzimt i izaugt mīlesteibā, izaugt par lobu cylvāku bez vardarbeibas apleik i sevie”. Jei navuica mīlesteibu i ciļvieceibu, bet paruoda, cik gryuši bez tuos ir dzeivuot. I tys ir daudz sarežgeituok nakai didaktiski vysu pasaceit prīškā. Nūdūt tuoļuok pīredzi, tok pošai nakomentēt tū, nasaceit, kas ir pareizi i kas napareizi.


Annele Slišāne divejus godus piec kuortys ir ījāmuse 1. vītu Latgolys prozys skaitejumu konkursā. Tys pīruoda na jau tū, ka latgalīšim tryuktu autoru, bet juos naapšaubamū meistareibu.