Tai ir saguojs, ka  Ēriks Zeps  piec pīcu godu raidejuma vadeišonys niu dareis cytus dorbus  i nūdūd stafeti tuoļuok. Aiz tuo itūreiz raidejumā gribim jius īpazeistynuot ar jaunū raidejuma „Kolnasāta” vadeituoju — horeografu, deju pedagogu, Deju svātku viersvadeituoju, Latgolys nūvoda folklorys kūpieju i popularizātuoju, tautys muzykys instrumentu meistaru i frizeri Ilmāru Dreļu.


Ilmārs Dreļs atkluoj, ka jis īrosts ar atvārtu sirdi pījem jaunus izaicynuojumus i ir gotovs aizsuokt koč kū jaunu. Dūmojūt par raidejuma vadeišonu, jis izsver, ka Latgolā ir daudzi breineigu cylvāku i aizrauteigu dareituoju, kurus byutu juoīpazeist i juoatkluoj.


„Tūs cylvākus ir vaira juoapzynoj. Latgolā ir daudzi breineigu cylvāku, kuri ite dzeivoj i struodoj. Dora sovu dorbu, kurais jim pateik i kuru jī meiļoj. Bīži viņ jī naskrīn i nasyt pi kryušu, ka jī ir varūni. Jī vīnkuoršai dora sovu dorbu i dūd Dīvs, kaba jī vēļ pīkristu iz koč kaidu interveju pasarunuot par tū, kū jī dora.”


Vaicuots par izaicynuojumim, aizsuocūt raidejuma vadeišonu Ilmārs pīzeist, ka nalels satraukums vysod ir kluotyn lobam rezultatam.


„Pastuov nerveņs manī. Kai byus, kas byus, kai tys vyss nūtiks, voi byus labi. Tam nerveņam ir juobyut, tys vyss ir dorbs, tikai struodojūt saprassim, kas ir pareizi, kas napareizi, kū vajag ci navajag maineit.”