Vīna nu zemeiguokūs nūtikšonu Latgolā i tuos kulturys dzeivē kotru godu nūteikti ir Latgalīšu kulturys goda bolva “Boņuks”. Itūgod 23. februara piecpušdīņē Latgolys viestnīceibā GORS tei tiks padūta jau divpadsmitū reizi. Aiz tuo itūreiz raidejumā saruna ar svineiguos ceremonejis “Boņuks 2019” jaunajim i atraktivajim vadeituojim Armandu Buļu i Lauri Zalānu.

“Bys muzykanti. Atpazeistami, i daudzi jūs byus. Nu i divi jauni vadeituoji – Lauris Zalāns i Armands Buļs.”

Obeji jaunīši sovu kasdīnu aizvoda Reigā, ite struodoj i dzeivoj. Lauris Zalāns sevi pozicionej kai vīnkuoršū latgalīti, kurš struodoj ari “Ghetto Games” komandā, sovpus Armands Buļs ir uorsts, kurš niu suocs dorbuotīs ari kai hip-hop muokslinīks Būrs.

“Prūtams, ir cylvāki, kuri atsagrīzs Latgolā i ite byus i dareis, bet jau tys viņ, ka mes asam tepoš Latvejā, Cik tod te leidz tai Reigai. Ir jau, prūtams, sirdī tys, ka tu atbrauc iz sātu, redzi lauku plašumus, aizej iz mežu  i vysod īsadūmoj, ka varātum atsagrīzt. Vajadzātu koč kai izplanavuot tai, kab piec godu desmit, pīcpadsmit, tu varātum atbraukt i ite dzeivuot sovā eipašumā, audzēt vuškys i prīcuotīs par dzeivi. Tuos drūsai viņ ir tikai atrunys, kurys tu izdūmoj, kab itū nadareit. Ir daudzi breineigu pīmāru, kur cylvāki ir atsagrīzuši atpakaļ ari nu tuoluoku zemu nikai Reiga ci Ventspiļs i dzeivoj, struodoj ite,” par dzeivuošonu Reigā i planim iz prīšku raidejuma vadeituojam Ērikam Zepam atkluoj Armands. Kai Lauris tai Armands ir prīceigi par īspieju vadeit ituo goda Latgalīšu kulturys goda bolvys Boņuks svineigū ceremoneju.

“Taidi izaicynuojumi pa reizei pasagrīž i tod, vysod juosoka nui…  Goda nūgrīznī “Boņuks” ir taids lobs atskaitis punkts, iz kū baļsteitīs, na jau tai, ka gaideišu i niu tikai “Boņuka” deļ struoduošu. Var pasavērt ari, kū cyti dora, tys ari drupeit stimulej koč kū vaira pošam izdareit. Es dūmoju, ka tys taidā ziņā ir breineigs pasuokums, taids kai latgalīšu “Oskars”. Tys nūeikti ir vajadzeigs i gūds vysim, kas jū izdūmuoja.”

“Forši ir tys, ka Latvejis radeja raida latgaliski,” -​ Lauris Zalāns.

 

***

Bet Rēzeknis teatrī ”Joriks” niule aktivi nūteik mieginuojumi režisora i dramaturga Edgara Niklasona izruodei “Saturna vārdā”. Zeimeigi, ka itei byus pyrmuo izruode trešū sezonu spielejūšajam, profesionalajam Rēzeknis latvīšu teatram, kurymā vaira byus dzieržama ari latgalīšu volūda. Kas vēļ interesanti – ari vysim izruodē īsaisteitajim akterim itei byus pyrmuo reize, kod jī iz skotivis runuos latgaliski. Režisoram latgalīšu volūdys īkļaušona izruodē atguojuse dabiski i pošsaprūtami.

“Vysa pyrma, jau pats teatris cīši seņ gribēja izruodi ar profesionalim akterim latgalīšu volūdā i ite mums cīši labi sakryta dūmys i idejis par tū, ka tys niu ir vajadzeigs. Izruode ir latvīšu, latgalīšu i ari krīvu volūdā.

Tys fenomenalais, ar kū maņ ari asociej Latgola, jius cīši uotri varit puorsaslēgt nu vīnys volūdys iz ūtru i tys ir tik interesanti.” 

Ari akteri latgalīšu volūdys īsavuiceišonu izruodis vajadzeibom uzjāmuši ar lelu interesi i cīnu. “Mums beja latgalīšu volūdys školuotuoja i, pasasokūt jai, es ari saprotu koč kaidus lykumus i tys beja cīši interesnai. Vyspuor lela prīca par itū volūdu Latvejis kulturys telpā. I ka jei vēļ teik kūpta i atteisteita, deļ myusu mozuos Latvejis itys ir cīši svareigi,” tai aktrise Anastaseja Rekuta-Džordževiča.

Pyrmizruode režisora Edgara Niklasona pyrmajam uzvadumam par Latgolu i pa daļai latgaliski – “Saturna vārdā” – Rēzeknis teatrī “Joriks” gaidoma jau 28. februarī septeņuos stuņdēs vokora.

 

***

Žvyrs – kas tys taids i kur jū var izmontuot, klausitēs Ilze Spergas i Arņa Slobožanina sagataveitajā vuordineicā.