Īrejis rītumūs storp 3x3 i 2x2 nometnem sasateikam ar jau pīcpadsmit godus Īrejā dzeivojūšū latgalīti Elzu Makhju, muziki, kura cyta storpā struodoj ari socialajā teiklā TikTok. Sarunā atkluojam folklorys, muzykys i volūdys ītekmi juos kasdīnā, dzeivojūt svešumā, i tū, deļkam jai ir svareigi  latgalīšu volūdu kai dzymtū nūdūt ari sovam divgadeigajam dālam.

"Es pīnamu vysu tū, kū dzeive maņ ir nūlykuse preteimā. Es asu pīdzymuse latgaliska saimē, maņ tāvs ar muoti runoj latgaliski.

Tei ir na tikai volūda, tys ir tys, kai es saprūtu pasauli, kai es saprūtu dzeivi, kaida mīlesteiba maņ ir īvuiceita, kai es prūtu runuot ar cylvākim, kai es saprūtu vysu lelū pasauli. Tys maņ ir īlykts nu tāva i muotis.

Caur volūdu i vysu tū, kas myusu dzeivē ir bejs. Es navaru tam špļaut viersā. Tys ir tys, kū es sevī cīnu, kū es nūvierteju sevī  i kū es ari sovam bārnam grybu īdūt tuoluok... Tys, kū es varu nūdūt tuoluok cytai paaudzei, ir lela vierteiba i, ka maņ īsadūs tū sovam bārnam īlikt, tod muna miseja itymā pasaulī byus pīpiļdeita."

Elza izsver, ka Latgola ir daļa nu juos i ir svareigi tū apsazynuot.

"Tu sevi pagaisynoj, ka tu atsasoki nu dalis seve. Teve nav. Daļa nu mane nūgaistu, ka es narunuotu latgaliski i napraktizātu tū"