Saļmu dzīduošona ir sovpateigs tautys dīvkolpuojums, kū izpylda sātā, ci Dvieseļdīnā – 2. novembrī, ari bazneicuos voi kapleicuos, taidā veidā kūpeigi aizlyudzūt par aizguojieju dvieselem. Ar mierki saglobuot,  atjaunuot i popularizēt saļmu dzīduošonu Stiernīnē, naseņ izdūts unikals  tradicionaluo psalmu i bēru dzīduojumu kruojums i dubultdiskys “Saļmes Stērnīnē”. Tuo sastateituoja ir Stiernīnis tautys noma vadeituoja i varganiste Īva Zepa.

„Itymā notu kruojumā ir apkūpuots vairuoku godu desmitu dorbs, jo gon dzīsmis, gon saļmis ir pīraksteitys nu vacajim teiciejim. Pyrmsuokumi vaicojami 1992. godā, kod nivīnam pat pruotā naīguoja, ka nazkod byus gruomota. Beidzamajūs godūs ir intensivuok struoduots, gon pi notu atšifriešonys, tū mes ar dirigentu Gruduļu Juoni paveicem un pi notu digitaliziešonys, miļzeigs paļdis Bernadetai Eversei.”

 Taipat Īva Zepa pīzeist, ka Stiernīnis pusē saļmu dzīduošona ir dzeiva i teik ryupeigi kūpta.

 „Ir gon vacuoki, gon jaunuoki dzīduotuoji, kas puorzynoj itū skaistū lyugšonu, un tei ir napīcīšameiba šū tradiceju saglobuot un deļ tuo jei jauši voi najauši ir juoīvuica ari jaunajai paaudzei. Un Stiernīnis draudzēs na tikai sāru reizēs giminēs un dzymtuos teik dzīduotys saļmis, bet dzīdojam saļmis ari kūpeigi bazneicā – piec tradicejis gon 1., gon 2. novembrī, taipat arī Draudzis nomā i ari tautys nomā mes sasapuļcejam, ari pansionatā. Itei ir līta, kas vīnoj, gon vysaidys paaudzis, gon ari itū i tū pasauli.”

Saļmu dzīduošona aba myrušūs ofīcejs parosti aizjam pusūtru, div stuņdis, kurūs Stiernīnē sovulaik saukuši par puotortolkom.

Unikalajā saļmu kruojumā „Saļmes Stērnīnē”, kur vydā gon notys, gon religiskī teksti i dzīsmis, gon tū īskaņuojums divejūs audiodiskūs, kai ari aproksts par saļmu dzīduotuojom i dzīduošonys tradiceju Stiernīnē, ir īguļdeits miļzeigs dorbs ituos pusis namaterialuos kulturys montuojuma saglobuošonā, i vystycamuok, ka jau pavysam dreiži, Nacionaluo Namaterialuo kulturys montuojuma sarokstā, sūpluok saļmu dzīduošonai Zīmeļlatgolā i saļmu dzīduošonai Vabalis i Leiksnys pogostūs, pīsapuļcēs ari saļmis Stiernīnē.