Itūreiz raidejuma “Kolnasāta” rodūšuo komanda beja nūbraukuse iz Ludzu, kab J.Soikāna Ludzys muokslys školā sasatiktu ar tuos direktori Sandru Vorkali. Aicynojom ari tevi kūpā ar mums dazynuot, kaida tod ir tei muokslys dzeive ite – austrumūs.

“Ir nūteikts vacums, kurā vys tik tu kai škoļnīks vuicīs nu tuo, kai školuotuojs tū dora. I ka tev ir tei laime – tū redzēt, tei ir teišom laime!

Partū ka, ja tu redzi degsmi i azartu, i guni školuotuojā – tys var dalipt. Tu vari tū nūspūguļuot. Lai tev pasaveic taidu školuotuoju atrast…” tai J.Soikāna Ludzys muokslys školys direktore Sandra Vorkale. Jei ari pīkreit, ka muzkys i muokslys izgleiteibā daudzi kas bolstuos iz pedagodu entuziasmu.
“Nu, ja tys tev nabyus sirds dorbs, tod tys byus nazynu kas… Pyrmkuort, tys nav obligati. Tys nav obligati ari školuotuojam nu taida vīdūkļa “es varu ari tū navuiceit”, bet, ja tu asi sirds dorbā, tod tu tū dareisi i tu reizem dori daudz vairuok nakai tys ir īraksteits dokumentūs. I taipoš tu vuici jam na tik daudz tikai tuos muokslys lītys, cik daudz nu svora ir tys – kai tu ar tū bārnu runoj, kū tu ar jū dori. Tys ir process. Nu, ir ari rezultats, vīnnūzeimeigi. Bet bez procesa kvalitatis tī nikas naīs cauri…”


Sandra atkluoj, ka gon ar jaunu pedagogu pīsaisti, gon bārnu skaitu školai lūbās labi, nasaverūt iz problemom itymā sferā, kas naratai pastuov citvīt vaļstī. “Itūgod školā vuicuos 296 bārni. Pādejūs treis, četrus godus mums beja augšupejūša dinamika jau ari caur tū, ka mes īsuocem septeņgadeigū programu i šūbreid mums ir pylns klašu komplekts. Aptveram vysys vacuma grupys.”

1991. godā dybynuotuo profesionaluos īvirzis i interešu izgleiteibys vuiceibu īstuode – Ludzys muokslys škola piec pīcu godu tyka puorsaukta profesora, muokslinīka, Ludzys pylsātys gūda pylsūņa Jura Soikāna vuordā.

“Ludzā ir Jezupa Soikāna īla. Bet tod, kod Jurs aizguoja myužeibā, Jura vuordā navarēja nūsaukt īlu, partū ka tod saeisynuojumā byus J. Soikāns. Divi J. Soikāni Ludzā navar byut. Jurs ir muokslinīks. Jis ir dzims cīši inteligentā i kulturalā gimenē. Tam laikam cīši izgleituotā gimenē. Juo tāvs beja kulturys darbinīks i sabīdryskais darbinīks, beja cīši interesanta personeiba. Dzeivis gaitys drūši viņ par jū lobuok stuostātu juo meita Ilze Soikāne-Mennekinga, kas dzeivoj Vuocejā. I attīceigi – Jezupa sīva beja muokslineica. Jei beja izagleituojusēs Sanktpīterburgā. Juram beja lels sakars ar muokslu jau nu pošu pyrmūs dīnu.”


Sandra pīzeist, ka radeišonys procesā ir cīši svareigi ari cylvāki apleicīnē. Tū jei redz ari kai vīnu nu unikalom i vierteigom lītom itymā školā.

“Muni školuotuoji i attīceigi myusu kolektivs ir eipašs. Es dūmoju, tei gimeniskuo sajiuta, kod muoksla nav tikai “augstuo” muoksla – “aukstuo”, “augstuo” ar “g” i “k”. Bet tei, kurā tu vari augt i justīs labi.”