Par myuža īguļdejumu latgalīšu kulturys atteisteibā itūgod Latgalīšu kulturys goda bolvys “Boņuks 2023” ceremonejā gūdynuos Jezupu Dobkeviču. Jū var saukt par Kruoslovys kulturys styprū bolstu. Jezupa Dobkeviča dorba myužs ir veļteits dzymtuo Latgolys nūvoda i vysvaira Kruoslovys pusis ļaudim. „Ka koč kū dzeivē i pagaisynovu, tod myužam navaru pagaisynuot cylvāku mīlesteibys. Mīlesteibys iz cylvākim. Maņ pateik byut ar cylvākim.” Jezups ir ilggadejs kulturys darbinīks, aktivs Kruoslovys Romys katuoļu draudzis i Kruoslovys pūļu bīdreibys dzeivis organizators. Jis ir pateiceigs liktiņam, ka īsadevs vysu myužu nūdzeivuot sovā pusē – Kruoslovā.

„Nikod myužā nasarūn vaicuojums par tū, kaids tu esi – kaids, nu kurīnis. Tu esi sovs. Sovs! Mes te pīrūbežā vysi sovejī. I sovim ir lela nūzeime.”