Par veseleibys nūzaris aktualitetem izvaicojam SIA “Preiļu slimnīca” vaļdis prīkšsādātuoju i Preiļu nūvoda dūmis deputati Ivetu Stari. Vaļstī uzsuokts dorbs pi veseleibys apryupis sistemys reformys, tei ītekmēs ari Preiļu slimineicu. I. Stare atkluoj, ka itūšaļt vysleluokais vaicuojums ir par slimineicys dzemdeibu nūdaļu, voi tū izadūsīs saglobuot. Planavuotuo reforma paredz mediķu olgu pīaugumu. Vaicojam ari, kaidu sovu pīnasamu Preiļu nūvoda atteisteibā saredz Iveta, asūt dūmis deputate.

 

Īsaveram Latgolys viesturis nūtikšonuos. Taišni septembrī paīt 152 godi, kai suocēs Latiņu drukys aizlīgums. Itymūs godūs Latgolā rodās kulturys fenomens – ar rūku raksteitys goreiga i laiceiga satura gruomotys. Zynomuokais gruomotu puorraksteituojs ir Andris Jurdžs. Stuostu sagatavejuse raidejuma producente Vineta Vilcāne.

 

 

Žurnaliste Laura Sondore-Strode pieteij, kaidys ir muojdzeivnīku, kaču i suņu, apbedeišonys īspiejis Latgolā. Vairums iz cytim medeibu laukim aizguojušūs kačus i suņus apgloboj piec sovim īskotim privateipašumā, bet voi tai dreikst, i voi Latgolā ir legalys dzeivnīku kopsātys?