Naseņ bejom nūbraukušs iz Rēzeknis nūvoda Leņdžu pogosta “Cepleišu” cīmu, kur dzeivoj i saimnīkoj Voguli. Jau vairuokuos paaudzēs dzymta nūsadorboj ar pūdnīceibu. Kūpā ar dveiņubruolim Juoni i Māri Vogulim, kai ari Māra saimi – sīvu Dzintru i meitu Elizabeti – runuojom par tū, kai jim ite vysim kūpā dzeivojās. Ite, “Cepleišūs”, sūpluok vīna nu spylgtuokūs Latgolys pūdnīku – Voldemāra Vogula – i juo sīvys, školuotuojis Olgys Vogulis sātai i kūpeigajai saimis darbineicai, jūs bārni ir sacāluši sovejis sātys i niu ite dzeivoj ar sovom saimem. Kai jī ite sadzeivoj, kūpā i atseviški dorbojās ar muolu i ni tikai, uzjem turistus, ar kaidom nūdarbem pīppylda garūs zīmys vokorus. Saprūtams, ar bruolim Vogulim, kurim pūdnīceiba nav tikai hobejs, bet gon ari sirdslīta, navarim naparunuot ari par Latgolys keramiku i tai rakstureigom īzeimem šudiņ i iz prīšku. 

“Latveja ir cīši boguota ar tradicionalū muokslu, tys ir na tikai muols i dzīsmis, vysuos jūmuos. Mes asam cīši talanteiga tauta. Varbyut mainuos vierzīni, bet Latgolys keramika piļneibā nikod napagaiss. 

Mums ir taida dvieseliska sajiuta, turiet rūkā ūtra tautīša darynuojumu, kas īt nu sirds, navys nu fabrikys."

Tai, vaicuots par tū, cik populara ir Latgolys keramika i kas ar jū nūtiks iz prīšku, pīzeist Māris Voguls.