Literate Ligija Purinaša ir sagatavejuse stuostu par napaseņ dīnys gaismu īraudzejušū Juoņa Cybuļska saraksteitū biografeju par sovu vactāvu, dzīsminīku i latgalīšu rūkroksta gruomotnīceibys puorstuovi Andryvu Jūrdžu, kuram itūgod teik svieteita 175. jubileja.

Andryva Jūrdža mozdāla Juoņa Cybuļska atminis par vactāvu saraksteitys 1975. godā, bet viņ itamā godā Latgolys Kulturys centra izdevnīceiba juos izdavuse. Tys nūtics par gūdu Andryva Jūrdža 175 godu jubilejai. Andryvs Jūrdžs ir latgalīšu rūkroksta literaturys spylgtuokais puorstuovs Drukys aizlīguma laikā. Jis dzims 1845. godā i dzeivuoja i dorbuojās Rogovkys pusē – Zaļmuižā, i teik skaiteits, ka sovys dzeivis laikā jis ir sarakstejs i pats īsiejs vysmoz 317 gruomotys. Lela daļa nu tūs 20. godu symta 20. godūs beja savuokta kai kolekceja Latgolys Centraluo muzeja topšonai, bet tei guoja būjā guņsgrākā. Myusu dīnuos jis pazeistams ar sovu 1916.g. sastateitū “Myužeigū kalinderi”, kurā īklautys pavuiceibys, aforismi, vāruojumi kotraigoda dīnai.