Arvin leluoku papularitati pādejā laikā daboj jaunuo aplikaceja „Clubhouse", kurā itūnedeļ nūtyka ari pyrmuo diskuseja latgaliski. Tymā tyka runuots par ituos šaļts aktualuokū latgaliskajā kultūrā – Latgalīšu kulturys goda bolvu „Boņuks 2020”. Par nominatim, ceremonejis izaicynuojumim, puorsteigumim pasuocīnī i nominantu vydā. Diskusis idejis autoris i organizātuojis ir latgaliskūs projektu i procesu aktiva vierzeituoja Edeite Husare i Latvejis Radejis Latgolys studejis vadeituoja Renāte Lazdiņa. Sarunā pīsadaleja ari Latgolys viestnīceibys GORS vadeituoja Diāna Zirniņa,  literats Oskars Orlovs aba Raibīs, kurš sovulaik stuoviejs pi „Boņuka” bolvys šyupela, Latvejis Radejis žurnaliste Daira Zīle, muzikis i raidejuma „Kolnasāta pyrmais vadeituojs Aigars Runčis”, arī Ēriks Zeps mikrafona ūtra pusē, kai ari cyti aktivī latgalīši. Itūreiz raidejumā klausitēs fragmentu nu sarunys. Par ituo goda izaicynuojumim ceremonejis organiziešonā turpynoj Diāna Zirniņa.


„Vysys ituos pandemejis deļ „Boņuka” ceremonejai ir jauni izaicynuojumi, ir Latvejis Televizeja, leidz šam mums beja LMT straume. Pasuokums byus gona virtualuos realitatis sajiutuos. I breineiguokais ir tys, ka, es soku gūdeigi, es leidz golam nazynu kai byus. Tū zyna Rūdolfs Baltiņš, varbyut, tū zyna Juoņs Skuteļs, varbyut. Nu, GORA zāle itūšaļt ir piļneigi bez krāslu, ar daudzi, daudzi tehnikys salykts, vysaidu kameru i mes veramīs, kai tys vyss atsadzeivuos taida virtualajā realitatē. Patīseibā tū, kū cylvāki redzēs televizoru ekranūs, tū tai vīnkuorši, fiziski iz vītys navarēs apjaust, redzēt… GORS nabyus tikai GORS, mes varēsim vīna briedī nūkliut koč zaļā pļovā. A kas tū lai zyna, varbyut aizīsim gostūs leidz Ontonam Kūkuojam ci Boņukam. Mes nabyusim vīna telpā. Tei virtualuo realitate mums ļaus ceļuot nu vīnys vītys iz ūtru. Tys vīnkuorsi ir juoredz.”


Jau šudiņ, 6. martā,  Latvejis Televizejis tīšraidē plkst. 21.05. nu Latgolys viestnīceibys GORS byus skotama Latgalīšu kulturys goda bolvys „Boņuks 2020” padūšonys ceremoneja.