Latgalīšu rokstu volūdys vuiciešonys pilotprojekts niu eistynojās 17 Latgolys školuos, gondreiž kotrā nu Latgolys pošvaļdeibu. Koč vuiceibu gods tikai suocīs, Ausma Sprukte raudzeis dazynuot, kaidi ir pyrmī sacynuojumi i voi pedagogim ir cereibys, ka iz prīšķu interese školānu i jūs vacuoku vydā par latgaliskū tikai augs.

Školuotuoji īvāruojušs, ka vīns nu faktoru, kas vacuokus attur nu fakultativa nūdarbeibu ir tys, ka bārni jau niu apmeklej vairuokus cytus puļceņus, tai ir ari lels zynuošonu tryukums par latgaliskūs vierteibu nūzeimi, taipat ari vys vēļ ir švuorbys, ka latgalīšu rokstu volūdys apgive radeis gryuteibys komunicēt latvyski. Taidu stereotipu cer maineit latgalīte, volūdneica i pietneica nu Latvejis Universitatis Anna Vulāne.

„Bārns varēs daudz lobuok i piļneiguok saprast latvīšu volūdu deļ tuo, ka latgalīšu rokstu volūda ir daļa nu latvīšu volūdys. Kotra izlūksne – daļa nu latvīšu volūdys.

I itī bārni, kuri vuiceisīs latgaliski, kuri sātā runoj latgaliski, jim byus daudz bogotuoka latgalīšu volūda. Tai ka tys ir cīši svareigai, kab ari vacuoki saprostu, tāvs, muote i babeņa i dzedeņš, vaciks i vaceite, kab saprostu, ka tys, kū jius latgaliskū īdūsit sovim bārnim – tys byus cīši, cīši svareigi.”

Vysā pilotprojektu niu eistynoj 17 školys vysā regionā, izjamūt Daugovpili i Leivuona nūvodu, latgalīšu rokstu volūdu vuica 22 školuotuoji. Turpynoj volūdneica Anna Vulāne.

„Itys ir cīši nūzmeigs nūtykums latgalīšu rokstu volūdys atteisteibys viesturē myusu dīnuos, deļtuo ka, lai latgalīšu rokstu volūda varātu pastuovēt, dzeivuot, atsateisteit, ir svareigi na tikai jū pieteit, na tikai par jū runuot, na tikai jū rokstūs lītuot, nu ari televizejā, radejā, kas ir cīši labi, ka tys nūteik i „Kolnasāta” raida i cyti … Ir svareigi, kab byutu puormontuojameiba.”

Pyrmī sacynuojumi piec diveju mienešu dorba ir taidi, ka programa ir kvalitativa, viņ cikom cīši daudzi atkareigs nu pošinicativys – izsver Rēzeknis 5. vydsškolys latgalīšu rokstu volūdys školuotuoja Aelita Andrejeva.

„Kuo mums pītryuktu? Koč kaidu metodiskūs materialu mums grybātūs, kab tī materiali ir na vīnā saitē, ūtrā saitē, trešā, bet byutu apkūpuojums. Grybātūs sapņuot par vuiceibu gruomotu, par dorba lopom.”

Kas vēļ svareigi i satrauc školuotuojus – niu vēļ vīns nu izaicynuojumu latgalīšu rokstu volūdys vuiceibuos ir attuolynuotais vuiceibu process.