Sabīdriskūs medeju svātku studejā Reigā ar dzīsmem gostūs Preiļu folklorys kūpa „Rūtoj” ar vadeituoju Ilzi Valaini, komponiste, Latgolys viestnīceibys „Gors” Muokslinīciskuos i pasuokuomu dalis vadeituoja, kora „Ezerzeme” dalineica Ilona Rupaine, Norvegejis latgalīte, Norvegejis latvīšu kora „Laipa” dalineica Ilga Švāne, folklorys dzīšmu i deju  kūpys „Svātra” dalinīki Inese i Oskars Zuģicki.


Par latgalīšim i latgaliskū 27. Vyspuorejūs latvīšu Dzīšmu i 17. Deju svātkūs, sajiutom i pīdzeivuotū.


„Sajiutys ir breineigys, ir spiedums acīs i taida īdviesme jaunim dorbim. Vysleluokais ir tys, ka tu atbrauc iz Latveju i ite sateic vysus sovus lobūs draugus i pazinis. Tys sajiutys padora vēļ breineiguokys,”

tai pīzeist Norvegejis latvīšu kora „Laipa” dalineica Ilga Švāne.


Kaidam juobyut dzīšmu svātku repertuaram – muokslinīciski augstvierteigam i sarežgeitam voi juodzīd vaira vysim zynomus dzīsmis, vaicuojom komponistei Ilonai Rupainei.

 
„Vysam juobyut leidzsvorā. Repertuarā juobyut dzīsmem, kas ir vysim zynomys, tyma skaitā tautysdzīsmis. Mes te, školā, runuojom ari par tū, ka nu nui, cik var dzīduot „Krauklīts sēž ozolā” voi ari „Rīga dimd”, voi cytys, bet mes ari saprūtam, ka ari myusu korī ir daudz jaunīšu, kuri pyrmū reizi dzīž svātkūs i kuri zyna pyrmū pantu, tuoļuok jī nazyna. Paaudzis nūsamej i kotrai jaunai paaudzei itei byus kai pyrmuo tautysdzīsme, kuru jī īsavuiceis. Tys ir vīns. Sovpus par tom sarežgeitajom dzīsmem ir tai, ka kors suokumā pukst i nasaprūt, redzīs, ka gryuts i tai, tai beja ari, par pīmāru, koncertā  „Tīrums. Dziesmas ceļš” skanieja Jēkaba Jančevska „Koki”, par kuru beja tik daudzi sarunu. Tik gryuta dzīsme i kai mes jū niu izdzīduosim, tik daudzi vysaidu paviersīņu, modulaceju i zeimu. Sovpus koncertā itei beja vīna nu viersyuņu, kai maņ redzīs. Leidzsvors, tys ir tys, par kū juodūmoj.”