Šūreiz raidejums ar tuo veiduotuojim pazaceļs gaisā, kab Latgolu īraudzātu nu putna liduojuma!

Izaruoda Latgolā pilotu natryukst, deļ tuo teikamēs uzreiz ar divejim pilotim - pasažīru lidmašynas kapteini Andreju Ludboržu i privātuos lidmašynas eipašnīku Visvaldi Kursīti.

Pilots Andrejs Ludboržs nuok nu Rēzeknes nūvoda Nautrānu pogosta Rogovkas. Jau nu mozom dīnom jis kuops kūkūs i vierīs dabasūs, sevišķi jam patyka kara lidmašynas, tūmār gols golā jis jau vaira kai 20 000 stunžu nūbraucs ar pasažiru lidmašynu, i sovu izvieli nanūžāloj. Leluokūtīs juo golamierki ir dažadys Eiropys pylsātys, bet lidojūt iz Moskovu skaidrā laikā jis nu augšas var redzēt sovu sātu Latgolā. Kai golvanū eipašeibu, kas vajadzeiga pilotam, jis nūsauc - nazabeišonu nu liduošonys.

 

 

Sovpus pi divvīteiguos privātuos lidmašynas eipašnīka Visvalža Kursīša mes braucam gostūs iz Jaunaglūnu, tai kai jis sūla nu sova pļovā īreikuotuo lidlauka myusus paceļt arī dabasūs.

Rušona azars, Cireits i upursola, Sivera azars, Čortaks, Kruoslova, Muokūņkolns, Lelais Līpukolns, bazneicys, pylskolni i prūtams Aglyunas bazilika - tys vyss i veļ daudzi kas cits, vīņ nalelā liduojumā ar Visvaldi Kursīti. Jam taipoš kai Andrejam Ludboržam sapnis par aviaceju suocīs bierneibā. Lai arī lidoj kotru dīnu, Latgolys ainova jam naapneik, bet poša liduošona saguodoj baudu.