Latgola uorpus Latgolys ir jauna rubrika, kurā dūdamēs iz dažaidom vītam Latvejā i cytur pasaulī, kam ir koč kaida saisteiba ar Latgolu ci latgalīšim. Itymā reizē raidejuma vadeituojs Ēriks Zeps kūpā ar žurnālisti Lauru Sondori-Strodi ir nūbraukušs iz apdzeivuotu vītu “Latgaļi” Ķeguma nūvoda Tomes pogostā i raudzēs tī atrast koč vīnu latgaliski runojūšu cylvāku ci ituos vītys saisteibu ar pošu Latgolu.

“Latgaļi”, kas vēļ naseņ beja cīms, bet tagad vīņ autobusu pīturys nūruode i puora sātys, myusu ceļuotuojus uzjem ar kaču i suņu pylnim pogolmim i atvārtim kai Latgolā cylvākim.

Latgalīšu saknes “Latgaļūs” raidejumā vaicuos Ķeguma nūvoda muzeja vadeituoja Ligita Ādamsone, vītejuo nūvodpietneica Ruta Andersone, Tomē dzeivojušīs Juoņs Ušpeļs i prūtams vītejī “Latgaļu” ļauds.