Kaidā februara pīktdīnis vokorā Guna Igavena beja nūbraukuse pi ituo goda Latgalīšu kulturys goda bolvys “Boņuks 2019” vīnys nu bolvu – Latgalīšu kulturys ziņu portala lakuga.lv skaiteituoju simpatejis bolvys “Žyks” – sajiemiejis Ivetys Seimonovys, kura jau daudzus godus kasdīnā dzeivoj Reigā. Stuosts gon itūreiz patīseibā ir naviņ par Ivetu, ar kuru raidejumā “Kolnasāta” asam sasatykuši jau ari agruok, bet gon par pārnejuo goda golā atkluotuos bīdreibys “Latgolys etnografiskuo viestīceiba” darbeibu i tyvuokuo laika planim, kai ari kasdīnys dorbim. Iveta ir vīna ituos bīdreibys veiduotuoju, kas ar sovu degsmi i entuziasmu naapšaubami spiejaizraut ari cytus. Iveta atkluoj, ka kūpumā bīdreibā ir sešys aktivys dalineicys, kas kotra ir orientāta drupeit iz sovu lauceni – tautystārps, šyušona, saktys, apovi i cyti ar etnografiskūs vierteibu atjaunuošonu, radeišonu i izpieti saisteiti procesi i lītys. Cyta storpā ituos bīdreibys juridiskais adress ir taišni Ivetys sāta Reigā, kur puora reizis nedeļā, vokorūs piec kasdīnys dorbu, sasapuļcej ituos bīdreibys dalineicys. Itymā vokorā raidejumā “Kolnasāta” klausitēs sarunu ar Ivetu Semanovu i Ingu Circeni.

Inga Circene: “Tys ir tys, kas myus vīnoj, ari tys deļ kuo mes sasapazynom i sastyvynuojom, jo redzim, ka mums cīši svareigs ir tys patīsums... Ir autentiskuos lītys, i ūtrys ir tys īguļdeitais dorbs, kab jaunuos lītys byutu kopejis autentiskom, cik nu tys ir īspiejams. Ar itū, pa munam, Iveta ir unikala, taidā amatera leiminī cylvāks spiej teišom tū izdareit. Tys, kū es nūvierteju, ir tei skurpulozitate, patīsums. Cylvāks ir siedejs arhivā i leidz milimetram izmierejs. Jai ir tīseibys saceit, ka jei lītys pasnādz teišom eistys.”

Sovpus Iveta pīzeist, ka atpazeit autentiski atdarynuotu lītu reizem nimoz nav tik vīglai.“Tikai ar leluokom zynuošonom tu vari atškiert eistuoku lītu nu ryupnīcyski ražuotuos. Jaunrade ari nav nūlīdzama, jai ir sova niša, sovs plaukteņš.”