Itūreiz raidejumā par divejom Latgolys kulturys dzeivē nūzeimeigom personeibom – muokslinīku, pedagogu i muokslys kritiki Juri Soikanu i tieļnīku Induli Folkmani.

Ar muokslys viesturneicu Andru Silapēteri, Ludzys turisma inpormacejis centra vadeituoju i J. Soikāna Ludzys muokslys školys školuotuoju Līgu Kondrāti, kai ari J.Soikāna Ludzys muokslys školys direktori Sandru Vorkali runuosim par garus godus trymdā pavadejušuo ludzuonīša Jura Soikana davumu Latvejis i Latgolys kulturys dzeivē. Ituo goda 12. aprelī muokslinīkam byutu symta godu. Svietejūt itū nūtikšonu, 23. februarī Latgolys viestnīceibā GORS tiks atkluota muokslinīkam velteituo izstuode “Magiskais realisms”.

Izstuodis kuratore Andra Silapētere stuosta, ka dorbs pi tuos aizasuocs jau pyrma pusūtra goda. “Tei muna saikne ar Juri Soikanu patīseibā ir taida, ka es jau vairuokus godus pieteju trymdys muokslinīku muokslu i leidz ar tū, muni celi ar itū personeibu, natīši ir sasakrystuojuši jau ari pyrma tuo. Dūmojūt par itū izstuodi, suoču ar telpu. Kas maņ ruodejuos svareigi, izstuosteit stuostu par muokslinīku. Mierkis beja ar itū ekspoziceju atkluot sova veida mozaiku – stuostu par Juri Soikanu. Kas jis beja, kū jis dareja. I kas beja tī vysaidī celi, cauri kurim jis ir guojs. Pieteju juo arhivu, kurš ir teišom unikals, fantastiskys i cīši boguoteigs. Par vīnu nu izstuodis vadmotivu es asmu izavēlējuse poša Jura Soikana raksteitū citatu. 1985. godā jis trymdys latvīšu muokslys žurnalā “Latvju māksla” roksta pats par sevi. Jis roksta, ka jis pats ir veidojīs treju kulturu mijīdarbeibā – latvīšu, krīvu i vuocu. Jis izsver tū, ka tys jam nikaidā ziņā nav škodiejs, bet gon ir jū boguotynuojs.”

Līga Kondrāte, kura ir ari Soikanu saimis draugs, te vēļ pībylst, ka Juri Soikanu nūteikti ītekmiejuse vēļ ari latgaliskuo kultura. Jei atkluoj, ka piec muokslinīka atsagrīzšonys atpakaļ dzimtinē, kur Jurs nūdzeivuoja pādejūs sešus godus, Līgai asūt bejuse vareiba jū satikt ari kluotīnē. “Piec atsagrīzšonys Latvejā jis atsagrīze ari Ludzā…Soikanu dzymta mums ir cīši svareiga i nūzemeiga. Jezups Soikans, kas ir Jura tāvs, sovā laikā beja cīši inteligents, zynūšs i progresivs cylvāks. Jis vysod ceinejuos par sovys pusis, apriņča, sova nūvoda cylvāku na viņ lobkluojeibu, bet, golvonūkuort, īšonu iz augšu, iz prīšku sovūs pruotūs, dvēselēs, kulturvidē. Jis ir bejs školu teikla dybynuotuojs, Ludzys apriņča ilggadejs prīšksādātuojs, pietejs senejū viesturi Ludzā. Jis apprecieja muokslineicu nu Pīterburgys, Olgu. Tuoļuok tys rodūšais gors ir guojs ari vysūs jūs bārnūs – Jurī, Nikolajā i Irēnā. Irēnys saime itūšaļt dzeivoj Australejā, Nikolaja – Anglejā. Jurs ir pazeistamuokais nu jūs vysu, pasasokūt sovam muokslinīka, pedagoga i muokslys zynuotnīka davumam pasauļa kontekstā. Niu tys vyssari turpynojās, Jura meita Ilze Soikane ari ir breineiga muokslineica, keramike, cīši azartiskysi sirsneigs cylvāks, kas pīdzymuse Vuocejā i sovu latgaliskū dobu atpazynuse, jau asūt lelūs godūs. Asu bezgola laimeiga, ka maņ ir bejuse vareiba ar jū sasatikt taišni Ludzys muzejā, iz kureini jei beja atvaduse ari sovu izstuodi… ari puorejī mozbārni ir aktivi kulturys cylvāki.”

“Jis ir dinamiskys, iz puordūmom rūsynūšs, juo grafikys maņ vyspuor redzīs taidys šampaniskys, jo gon nūsaukumi, gon sižeti nav taida gausšonuos ci nūgrymšona, bet tys ari nav sprostai cilātai. Tei ir taids cīši dzierksteleiga prīca i redzīņs iz nūtikšonom. Tys tai, runojūt par J. Soikana grafikom, cīši dinamiskys. Tys, kurš grybātum īraudzeit klasisku klusū dobu, tī tū naatrass. Kai saceit juosoka –vysi puiškini ir leli eksperimentatori, i es dūmoju, ka Juram tys eksperimentatora gors vīnnūzeimeigi ir izapauds cīši taiduos veseleiguos lītuos, kurus nūteikti pamat zeimeigus pādus. Nataidus sastyngušus i nadzeivus, bet taidus, kuri var dzeivuot tuoļuok i puorsaveiduot. Puortapt koč kaidā cytā impulsā, i tys, maņ redzīs, ir pats svareiguokais.”

 

***

Taipat raidejumā klausitēs ari Gunys Igavenys sarunu ar Latgolys viestnīceibys GORS muokslinīcyskuos i pasuokumu nūdalis vadeituoju, Latgalīšu kulturys goda bolvys “Boņuks” žurejis komisejis lūcekli Ilonu Rupaini. Napaseņ Ilona beja gostūs Vacumnīku nūvoda Bārbelis pogostu, kur sasatykuse ar Latgalīšu kulturys goda bolvys “Boņuks 2019” atzineibys par myuža īguldejumu latgalīšu kulturys atteisteibā sajiemieju, tieļnīku Induli Folkmani. Par gasteišonu muokslinīka sātā, juo īguļdejumu Latgolys kulturā imuokslys dzeivē, par pīminiekļa “Vienoti Latvijai” aba tautā saukta “Latgolys Muorys” atjaunuošonu.