Itūreiz „Kolnasātā” klausitēs Teņa Bikovska sarunys fragmentu nu raidejumu cykla „Pi myusim Latgolā” 12. juļa laidīni ar ludzuonīti, pasauļa slovonū handbolistu Daini Krištopānu.

Ludzuonīts Daiņs Krištopāns ir vīns nu Latvejis lobuokūs handbolistu, kurš itam sporta veidam pīsavierss jau suokumškolā, kod iz školu atguojs jauns treners, kurš suoce vadeit handbola puļceņu.

„Aizguoju, jo leluokuo daļa nu klasisbīdru, nu draugu jau beja handbolā. Aizguoju paraudzeit, skaidrys, ka ar taidu augumu i tod, ka treners vēļ redzieja, ka ir koč kaidys perspektivys. Tai suocēs muni treņeni. Skaidrys, ka storpā vēļ aizguoju iz kaidu basketbola puļceņu, kas beja, i tai tuoļuok,” stuosta Daiņs.

Daiņs atkluoj, ka juo treners Andrejs Narnickis ari īt nu Ludzys. Jis pīzeist, ka entuziasmys handbolā vysod ir bejs i byus. Taipoš jis stuosta, ka sovu karjeru vītejā sporta klubā „Latgols”, kurymā pamatā spēlej naprofesionali sportisti i nasajem par tū olgu. Te gon Daiņs ir puorlīcynuots, ka profesionalys karjerys atteisteibai tys nav škierslis, golvonais ir gribēt i daudzi pi tuo struoduot.

„Tys ir tys dorbs, kū treners Narnickis ar mani kūpā īguļdeja, i es dūmoju, ka tys ir tys dorbs, ar kuru es turpynuoju sovu karjeru. Eistineibā jau nikaids nūslāpums, vysi zyna, kai tu trenejīs, ceņtīs, i tys vyss ari atsaspīgeļoj. Skaidrys ir koč kaids procents, ka vāga byut talanteigam i tai tuoļuok, bet pats, pats pyrmīs ite ir treneni. Ka tu trenejīs i īguļdi lelu dorbu, tu zini, ka tys dorbs īs atpakaļ... Jebkurš handbolā var atsateisteit, viņ vāga atrast pareizū vītu i īguļdeit lelu, lelu dorbu.”

 

***

Sižetā Guna Igavena stuosteis par Vosorys Pasauļa latvīšu jaunīšu seminaru 2x2, kas itūgod laikā nu 26. juļa leidz 2. augustam pyrmu reizi nūtiks taišni Latgolys regionā, Daugovpiļs nūvodā.

 

***

Viesturis rubrikā Kaspars Strods īsavērs Latgolys nūvoda rehabilitacejis centra „Rāzna” viesturis puslopuos.