Kūpā ar Ludzys patrioti, Ludzys turysma i informacejis centra vadeituoju, bīdreibys „Lydzys amatnīks” vadeituoju i veiduotuoju Līgu Kondrāti runojam par Latgolys namaterialū kulturys montuojumu i tuo ilgtspieju. Ituos nedelis suokumā Latgolys viestnīceibā GORS, Rēzeknē, nūsarysynuoja seminaru cykla „Latgales tradīciju ilgtspēja mūsdienu vidē”, kuru organizej Latvejis Nacionalais kulturys centrs, sadarbeibā ar bīdreibu „Dienvidlatgales NVO atbalsta centrs” ūtrais, nūslādzūšais seminars – „Tradiceju ilgtspieja: lobuos praksis pīmāri”, kas tyka veļteits namaterialuo kulturys montuojuma praktiskim aspektim. Līga Kondrāte beja ari vīna nu ituo seminara moderatoru.

„Paļdis Oskaram Zuģickim, kas mums regionā voda navaļstiskuos organizacejis, tei beja juo dūma i dorbs, i jis mani paaicynuoja par paleigu izveiduot saturiski ūtrū seminaru par omotim. Maņ cīši patyka, jo itei ir muna sirdslīta jau daudzus godus, naviņ maņ, bet ari vysam myusu Ludzys amatnīku centra kolektivam. Kai ari daudzim, daudzim myusu draugim pa vysu Latgolu i maņ redzejuos cīši svareigi, ka mes parunojom sovā storpā par tik nūzeimeigom lītom. Kas mums traucej struodot, kas tod ir tei vierteiba i par kū jei vyspuor ir juosagloboj, kas tod ir tei pamatvierteiba, tei klasiskuo omota prasme. Tai kai ir cīši daudzi ari vysaidu jaunradis omotu i kai tū vyslobuok dareit. Tī, maņ redzīs, beja taidi cīši nūzeimeigi vaicuojumi, i es prīcojūs, ka mums īsadeve uzrunuot tik daudzi lobu lektoru, runuotuoju. Daudzi izruonuojam tū, kas vysim iz sirds. Pasavērem iz prīšku. Beja daudzi lobu prīkšlykumu, ideju i akcentu.”  

Taipat Līga Kondrāte izsver, ka daudzais dalinīku skaits līcynoj par tū, ka itī semināri dabuoja plotu rezonansi naviņ regiona, bet ari vaļsts leiminī. Līga pīzeist, ka namaterialais kulturys montuojums ir tradiceja i tūs kūpšona.

„Tys ir ašnī i īt nu paaudzis paaudzē. Kai es seminara nūslāgumā saceju, mes asam mantinīki tik daudzom lobom lītom i vierteibom, ka mums byutu nu svora, kai mums niu vyslobuok tuos naviņ sagluobt i saglobuot, bet mums jau juos juonūdūd tyukstūšom godu iz prīšku. Mes asam tī, kas nadreikst tuos pazaudēt tai, ka nabyus pat cytai paaudzei, myusu bārnim. Itys ari ir tys svareiguokais vaicuojums, kas nūsoka ari tū, kas mes asam.

Ka es asu latgalīts, tod kas mani veidoj par latgalīti. Tei nav tikai volūda, bet ari. Tei ir muna sāta, muna vide, prasme voi dzeivis parodumi, kas ite ir.

Kai munai babai sātā beja sakuortuota dzeive, kai jei ritieja, kū jei prota, kū vacaistāvs prota, par kū jī darieja tai i na cytaižuok? Parkū svieteja svātkus tai i na cytaižuok? Par kū jī olu vuorieja tymuos dīnuyos i na cytuos i kai jī tū olu dzēra kūpā? Tei ir tei myusu naviņ pīdereiba pi sovu sakņu i latgalīšu ciļts, bet ari pi myusu dzeivisveida, tradicejom i kulturys.”

Vīns nu ituo laika izaicynuojumu itūšaļt jau ir tys, kai pastuosteit, paruodeit i ari īvuiceit izzyudūšus omotus i cytys namaterialuo kulturys montuojuma vierteibys jaunajai paaudzei. Kai juos saglobuot dzeivys.

„Ir daudzi taidu lītu, kas dzeivē ir cīši izamainejušys, mums vaira nav zyrgu kotrā sātā. Tu sovā bierneibā nūteikti dabuoji i pi orkla pastuovēt i buļvys laseit piec orkla izortā vogā, i vedi sīnu, iz skaudzis viersā gulādams, i rogovuos brauci. Itūšaļt mums ir cīši juopavaicoj, kur vēļ ir taidys īspiejis, bet tei ir tik lela i nūzeimeiga vierteiba, ka maņ ir nu sirds žāļ tū bārnu bārnu, ka jim vaira tū kruošņū ainovu voi sajitu nabyus.

Tai kai nav daudzu lītu sātā, tod daudzi omoti i prasmis izzyud. Tys pats zyrgu apkaliejs, zyrglītu ražuotuojs, vysi dorbi ar zyrgu, kurus ogruok prota kotrys.

Kurs niu vairs jādz aizjiugt zyrga, nu labi, tī kas jauneibā tū beja darejuši, varbyut vēļ izdareis, bet voi myusu bārni prass tū izdareit, ka vādzēs. Tuos pošys ausšonys prasmis, niu mums tū dora meistaris, seņuok tu dareja kotra sīvīte sovā sātā. Maizi cepe. Itim vysim dorbim kai jumtu jumšona ar skaidom, voi solmim, voi ar nīdrem, voi kalieja dorbs. Pat elementarys lītys sātā prota kotrys veirīts, ari nu metala, vysi kūka dorbi, mucu taiseišona. Apavis i apgierba izgataveišona, tuos ir taidys lītys, kas praseja dīzgon lelys zynuošonys, ryupeigys i pamateigys prasmis. Es pat saceitu, ka vysi ti dorbi ir ar cīši daudzom niaņsem.”

Ir īcarāts, ka piec itūs seminaru tiks dūmuots i veiduots materials, kas iz prīšku dūtu vareibu īsavērt senejūs omotūs i, kod rūnās interese, ari vareibu tūs resataurēt.

„Byus labi ari tod, ja koč kod piec godim, kod rassīs taida vajadzeiba ci interese, tī bārni spēs piec tuo materiala, kas mums byus, zynuotniski īraksteits, ekspedicejuos voi cytaižuok, voi nūfiļmeits tys dorbs, voi rokstu raudžu burtneicys, dorbu paraugi. Es dūmoju, ka piec tuo daudzi kū varēs atkūst i sataiseit...

Mes šudiņ ruonuojom ari ar Namaterialuo kulturys centra meitinem, ka cīši grybātus jūs na vīnkuorši nūfiļmēt, vādzātu vys tik taidu zynuotniskū pīeju, lai jis byutu plotai izmontojams materials ari pietnīkim, naviņ omota restauratorim. Projekta rezultata ir topušs ari divejis skaistys video kinys, kurys seminara laikā ari tyka paruodeitys. Vīna par Saļimonu Ķipļuku, peterņu pinieju, sovpus ūtra ar Vogulu saimi.”

Līga ir puorlīcynuota, ka laiks vysu salīk pa vītom i jau niu ir vārojama arviņ leluoka interese par rūku dorbu, par amatnīku izstruoduojumim i dzeivi saskaņā ar dobu.

 „Amatnīka rūku radeitai lītai jau vysod byus cyta energeja. Jei vysod byus sylta i cīši ilgi lītojama līta, jei byus tova. Ražuojumam ryupneicā nikod nabyus taida pīvīnuotuo vierteiba… Mums vysim itymā stresa sarausteiteja pasaulī gribīs harmonejis. Amatnīka dorba, taida kas ir izguojs tyukstūšys godu puorbaudi, jimā ir vyspiļneiguokuo harmoneja i gaume. Tī vaira nav ni juosastreida, ni juovaicoj.”

Pyrma kaida laika Ludzys turysma informacejis centra socialūs teiklū kontūs beja izlykts sludynuojums, kurā jī lyudz atsasaukt senejūs omotu prasmu meistarus ci pastuosteit, kur taidus var vaicuot. Līga Kondrāte stuosta, ka atsauceiba ir loba i atsasauc vysaidu omotu pratieji na viņ nu Latgolys.

„Itūšaļt mums ir drupeit puori symtam, ka skaiteit ar vysim tim, kas vēļ nav tyvai pi izzyudūšu, i ap divejim symtim omotu meistaru, ar kontaktinformaceju, vairuok ci mozuok. Ka nu ituo saroksta izdaleit taidus izzyudūšūs omotu pratiejus, taidi ir ap pīcdemit cylvāku pa vysu Latgolu. Es dūmoju, ka mes nikaidā ziņā itū sarokstu navarim nūslēgt, jis ir juoturpynoj. Aizvakar mes tū uzaicynojumu otkol īlykom atkuortuoti… Es dūmoju, ka itei tema ir cīši aktuala ari vysim citim regionim. Muna stypra puorlīceiba, ka Latveja kai taida ir cīši boguota valsts kuļturvidis i prasmu ziņā.”

Līga pīkreit apgolvuojumam, ka leidz amatnīkam ir juoizaug, i ite lobu pamatu var īlikt taišni saimē, kur bārnam veidojās tei vierteibu sistemys izpratne.

„Tū navar dareit pavysam jauns bārns, jam ir sovā dvēselē i pruotā, sovā byuteibā jam ir juonūbrīst i juoizaug leidz tam i itī ari taidi lobi vuordi. Mums byutu juodūmoj par tū, kai nūturēt interesi voi saglobuot lītu leidz tam breižam, kod tys jaunīts ir gotovs jū suokt dareit.”

Līga pīzeist, ka turysms amatnīceibā i amatnīka omota prestiža ceļšonā, amatnīku popularizeišonā, kai ari finansialu apsvārumu deļ ir cīši lobs instruments. Pi tuo myusdīnuos tys kliust arviņ pīpraseituoks.

„Turysmā mums amatnīceiba niu ir cīši daudzi puorstuoveita, nu koč voi tei poša akceja „Zalta rūku ceļš”, kod amatnīki taiseja durovys sovom darbineicom vaļā i beja ar mīru naviņ ruodeit, bet ari vuiceit sovys prasmis tim, kas interesejuos. Tū karti mes dabuojom tiražēt divejis reizis, izdūt atkuortuoti. Tei beja taida nūtureiga i cīši loba interese, kurai golā beja ari taidys saimis i taidi jaunīši, kuri atroda sovu aicynuojumu i sovu dorbu iz prīšku. Cīši lobs veids. Tys, kū mes niu ari COVID izplateibys ītekmē redzim, ka

turisti arviņ vaira orientejās iz ekologiskū, iz dobys turysmu, iz sajiutom, personalizejās i arviņ vaira gryb koč kū ar taidu īgivumu sev pošam i amatnīku dorbi, amatnīku darbineicys sevkurā izpiļdejumā.”

Kaba dorba dareituojs, zynuošonys i prasmis napagaistu globalizacejā, jau saimē juoīllīk pamatvierteibys. Muokai puordūt nav juoīt pa prīšku radeitajam dorbam.

„Turamīs pi sovu sakņu, i tod vysi vieji i nagaisi, kas niu plūsās pa pasauli, mums īs puori. Saglobojom sevi, sovus cylvākus sev apliek, sovu pošpuorlīcynuoteibu i prasmis. Sagolobojom sovu ticeibu i tod jau mes tiksim tam vysam puori.”