Maija Gailuma: īpazeistynuot tagadni ar paguotni

Multimuokslineica Maija Gailuma ir „laimeiga, naatkareiga, dzeivoj laukūs”, struodoj ar muolu, ir pedagoge, floriste. Jau 35 godus vuica bārnim muola veidošonu Jura Soikāna Ludzys muokslys školys Nautrānu filiālē, reikoj rodūšuos darbneicys, organizej Latgolys regiona školu vizualuos muokslys i keramikys puļceņu radūšū konkursu, kū reiz dareja kūpā ar veiru pūdnīku Pīteri Gailumu (1962–2017).

Nu 1. da 26. apreļa Rēzeknis nūvodā nūtiks 46. Latgolys pūdnīku dīnom veļteiti pasuokumi. Golvonū cepli, pat divejus, itūgod 25. aprelī kurynuos Rēzeknis nūvoda Ilzeskolna pogosta Jaungailumūs darbneicā „Podnieki” pi Maijis Gailumys.

Pi Maijis Gailumus sasateik škola, rodūšums i muola tradicejis. Muokslys školā Rogovkā niu vuicās 40 bārni i Maija Gailuma stuosta, kai muols īsadzeivoj bārnu rūkuos: „Kū agruok mes jūs īvalkam muola meiceišonys i muola aktivitašu pasuokumūs, tū bārnim ari koč kas aizakerās, turpynojās i veidojās. Muoksla i vysys radūšuos lītys ateista bārnus, i radūšais potencials nūder vysys dzeivis garumā.”

Bārnim ir juostuosta praktiskys pamatlītys, soka Maija Gailuma, par pīmāru, ar kū atsašķir muola škeivs nu bļūdenis, kaida ir svečturu nūzeime,

„školuotuoja funkceja ir īpazeistynuot tagadni ar paguotni, lai bārnim ir informaceja.

Izgleiteiba ir obligata, tu vari veiduot sovu rūkrokstu, sovys emocionaluos lītys, tok pamats tev ir obligats, ari tehniski, lai piec tam nav juopīdūmoj. Puormontuojameiba nu vacmeistarim vaira itymā pūsmā nav īspiejama, dažuos dzymtuos ir palykuši meistari, bet školys dūd tū pamatu.”