Itūreiz aicynojam kūpa ar mums nūbraukt iz Dagdys nūvoda „Zundim”, kur dzeivoj i saiminīkoj  Mārtiņš i Gunta Vaičuli. Patīseibā jūs saimisteiba atsarūn treju nūvodu krustpunktā – Rēzeknis, Dagdys i Aglyunys. Paraleli biologiskai galis lellūpu audziešonai Gunta aktivi sportoj i gatavejās Tokejā gaidomajom olimpiskajom spēlem. Runuosim gon par dobai draudziegu saiminīkuošonu, gon Guntys atsagrīzšonu lelajā sportā piec meitys Rūtys pīdzimšonys.


„Nikas vīns ūtram natraucej, ka mes gribim savīnuot taidys lītys, kas mums eistyn pateik.

Tys progress munuos sajiutuos beja taids vāra jamams, ar kotru dīnu es varieju izdareit vaira i ari saguoja lobuok. Motivaceja roduos poša nu seve. Tei roduos tod, ka es treniejūs. Cikom es vēļ nasatrenieju, es dūmuoju, ka tys vyspuor nabyus īspiejams.”


Var tikai prīcuotīs i apbreinuot ar kaidu mīlesteibu i cīnu jaunī saiminīki Mārtiņš i Gunta stuosta par sovu ap diveju symtu lelū galis lellūpu gonampulku. Mārtiņš izsver, ka patīseibā nu pyrmuo skota leidzeigi lūpeni, ir kotrys cytaižuoks.


„Es vodūs piec frontalajim numurim ausīs. Tev redzīs, ka juos vysys ir boltys i vīnaidys, bet es pryncypā jau nu gobola, piec golvys varu pasceit, kaids jai numers ir. Leluokū daļu atpazeitu ari nu suona ci aizmuguris. Pīrosts, ka tu dīndīnā pi jūs īmi, kotrai zyni raksturu i kū nu juos var gaideit. Deļ tuo varbyut var saukt ari par ūtru saimi, jo tu kotru tū lūpeni pazeisti kai saimis lūcekli.”